''قانون بین الاقوام کی بنیادیں عہد اسلامی میں''ایک تحقیقی جائزہ

'' Foundations of International Law in the Islamic era ''

(An Exploratory review)

^Hafiz Muhammad Umair

^Dr. Mahmood Sultan Khokhar

Human nature is collectivist. Therefore, men's survival is in living together and fulfilling the necessities of life through mutual cooperation. As a result, a system of mutual relation is formed; the state has relation with the other states just as the individual has relations with other individuals. If there is no balance and harmony in this relationship, then mutual conflict and tension is natural. In fact, international law has its beginnings from the Islamic era. The Prophet (peace and blessings of Allah be upon him) conveyed the universal message of the Islamic State throughout the world through his foreign Strategy and diplomatic letters. Away from the concept of globalization, the importance of foreign relations has become more important in modern times. Therefore, just as it is necessary for the Islamic state to harmonize with the world conditions and events according to the requirements of the modern era, it is also necessary for the Islamic state to keep its ideological position in mind in all situations. So that the foreign strategy of the Islamic State is established on strong foundations and its principles are formulated in the light of International Law and Sharia.

Keywords: International Law, Foreign Policy, Foundations, Islamic era, Islamic International Law, International Relations.

تمہید:

انسان فطرتاً اجتماعیت پسند واقع ہوا ہے اورباہم مل جل کر زندگی گزارنے ، باہمی تعاون سے ضرریات زندگی کی تکمیل میں ہی انسان کی بقاء ہے جس کے نتیجے میں باہمی تعلقات کا نظام تشکیل پاتا ہے۔ فرد کے فرد کے ساتھ تعلق کی ریاست کا دوسری ریاستوں کے ساتھ تعلق ہوتا ہے۔ اگر اس تعلق میں توازن و ہم آہنگی نہ ہو توباہمی کشمکش اور تعلقات میں تناؤفطری بات ہے۔ اس باہمی توازن و امن کی بقاء کیلئے ایک مثبت و مربوط قانون و حکمت عملی کی ضرورت ہوتی ہے جسے خارجہ حکمت عملی کہتے ہیں۔ اور قانون بین ا لاقوام خارجہ حکمت عملی کا مفہوم توسیعی ہے۔

دین اسلام انسانی زندگی کی مشکلات و ضروریات(خواہ شخصی ہوں یا قومی ، ملکی ہوں یا بین الاقوامی تمام )کے حل کیلئے عالمگیر قانون پیش کرتا ہے اور درحقیقت انٹرنیشنل لاء کا آغاز بھی اسلامی عہد سے ہوا ہے جس میں نبی کریم ﷺ نے اپنی خارجہ تعلقات کی حکمت عملیوں اور سفارتی خطوط کے ذریعے اطراف عالم میں حکمرانوں اور سلاطین وقت تک اسلامی ریاست کے آفاقی پیغام کوپہنچایا۔ دور جدید میں گلوبلائزیشن کے تصور سے شعبہ خارجہ تعلقات کی اہمیت اور بھی زیادہ ہو گئی ہے۔ ایک اسلامی ریاست کیلئے جس طرح دور جدید کے تقاضوں کے پیش نظر حالات و واقعات سے ہم آہنگی ضروری ہے اسی طرح اسلامی ریاست کیلئے اپنے نظریاتی تشخص کو بھی تمام حالات میں ملحوظ رکھنا لازمی ہے تاکہ اسلامی ریاست کی خارجہ حکمت عملی دورجدید کے ساتھ ہم آہنگ ہونے کے ساتھ ساتھ قانون بین الاقوام سے بھی متصادم نہ ہو اور اپنی مضبوط بنیادوں پرقائم ہو ، اسلامی ریاست کے نظریاتی تشخص کی محافظ ہواور اسکے تمام اصول وقوانین شریعت کی روشنی میں وضع کیے جائیں۔ اورانہی حکمت عملیوں کو جب وسیع تناظر میں دیکھا جاتا ہے تواس میں ملک وریاست کے دوسری مملکتوں کے ساتھ تعلقات، معاہدات ، جنگی قیدیوں کے ساتھ سلوک سے متعلق قوانین اور عالمی سطح پر ملکی سالمیت و تشخص برقرار رکھنے سے متعلق اقدامات شامل ہوتے ہیں اور اسے شریعت اسلامی میں "السیَر" یعنی قانون بین الاقوام کہا جاتا ہے۔گویا خارجہ حکمت عملی قانون بین الاقوام کے تناظر میں ملکی سطح پر کیے جانے والے عملی اقدامات کے مجموعے کا نام ہے۔

۱۔ قانون بین الاقوام کی اصطلاح:

شریعت اسلامیہ میں خارجہ تعلقات خواہ بین الاقوام ہوں یا بین الممالک ہوں ، ان کیلئے ''السِیر'' کی اصطلاح مستعمل ہے۔جبکہ(International Law) قانون بین الاقوام میں لفظ'' بین الاقوامی '' عصر حاضر میں ایک اصطلاح کے طور پر استعمال ہوتا ہے، جس میں ایک سے زیادہ اقوام یا ممالک قومی حدود سے باہر بیرونی تعلقات و خارجہ معاملات میں ملوث ہوں ۔ اور ان ممالک کے تعلقات کے(خواہ وہ تعلقات امن کے ہوں یا جنگ کے ہوں ) باہمی اصول وقوائد کو قانون بین الاقوام کہتے ہیں ۔ اسی طرح ریاستوں اورقوموں کے درمیان تعلقات جن قوائد کی پابندی میں قائم ہوتے ہیں ۔ انہیں قانون بین الاقوام کے اصول یاخارجہ حکمت عملی کہا جاتاہے گویا خارجہ حکمت عملی یا قانون بین الاقوام ایک آزاد ملک کے ان اقدامات کے مجموعے کانام ہے جو ایک ملک اپنے قومی ڈھانچے و ملکی مفادات کے تحفظ کیلئے اٹھاتاہے ۔ ¹

اس سلسلے میں ڈاکٹر حمید اللہ کاکہنا یہ ہے کہ قانون بین الاقوام یا خارجہ حکمت عملی مقتدر ریاستوں کے باہمی تعلقات پر مبنی ہے اوریہ ضروری نہیں ہے کہ ان قواعد کاطریقہ کار بیک وقت تمام ریاستوں کے لیے یکساں ہی ہو بلکہ مختلف خطوں میں ان کے طریقے اورقوانین مختلف بھی ہوسکتے ہیں ۔ ²

لہٰذا عصر حاضر کا قانون بین الاقوام درحقیقت شریعت اسلامی کے باب " السیَر" کی ہی جدید شکل ہے ۔اور قومی و ملکی مفادات کے تحفظ کیلئے ہر ملک اپنی خارجہ حکمت عملیوں سے اس قانون کو ملحوظ رکھتے ہوئے قوانین و ضوابط طے کرتا ہے ۔ تاکہ ملک و قوم کا عالمی تناظر میں تشخص برقرار رکھ سکےاور مفادات کا تحفظ یقینی بنایا جا سکے۔

۲۔ خارجہ حکمت عملی کامفہوم:

لغت کے اعتبار سے خارجہ حکمت عملی دو الفاظ ''خارجہ'' اور '' حکمت عملی '' سے مرکب ہے اورحکمت عملی کیلئے انگریزی میں پالیسی(Policy) کا لفظ استعمال ہوتا ہے۔ خارجہ عربی زبان کا لفظ ہے جو کہ خَرَجَ یَخْرُجُ خُرُوْجاً و مَخْرَجاً سے نکلا ہے ۔ خرج فی العلم بمعنیٰ فائق ہونااور "خرج الرعیة علیٰ الملک "بمعنیٰ سرکشی و بغاوت کرنا، اسی سے فاعل کا صیغہ الخارج آتا ہے جس کے معنیٰ نکلنے والا ، ہر چیز کا ظاہر، باہر والی چیزہے اور یہ داخل کی ضد ہے یعنی ملکی سرحدات سے باہر نکلنا، اسکی جمع خارجات و خوارج آتی ہے جس سے مراد باغی اور جماعت سے نکلے ہوئے لوگ ہیں ، خارجہ اس منصب کو بھی کہتے ہیں جسکے تعلقات دوسری حکومتوں سے ہوں۔³

حکمت عملی یا پالیسی کی بنیاد وہی مادہ ہے جو لفظ Politic کا ہے بین الاقوامی معاملات میں Politic کا مقصدوہ راستہ ، طریقہ کار یا عقلی حکمت عملی ہے جو حکومتی مشینری چلانے کیلئے بروئے کار لائی جاتی ہے۔ڈاکٹر اکرام اعظام لکھتے ہیں:

"The term policy has the same root as politics in the international affairs it means the choices action / direction open to / eleted by any given state."⁴

''پالیسی کی اصطلاح کی بنیاد وہی ہے جو لفظ سیاست کی ہے، بین الاقوامی معاملات میں اسکا مقصدوہ اختیارات و محرکات اوراطراف و جوانب ہیں جوکسی بھی ریاست کے انتخاب کیلئے کھلی رہتی ہیں'' اصطلاحی معنیٰ کے اعتبارسے مختلف مفکرین نے متعددتعریفات سے خارجہ حکمت عملی کو واضح کیا ہے۔

پروفیسر Joseph Francel کے مطابق خارجہ حکمت عملی وہ علم ہے جسکے ذریعے بین الاقوامی تعلقات کی تشریح کی جاتی ہے ۔

"Foreign policy consists of decisions and actions which involve to some appreciable extent relation between one state and others."⁵

'' خارجہ حکمت عملی ان گروہوں کے قواعد وضوابط اور بروئے کار لانے کے اصولوں کو شامل ہے جو ایک ریاست کے رویے کودیگر ریاستوں کے ساتھ اپنی حجت بازی کے دوران متشکل کرتی ہے تاکہ اس کے مقاصد کو حاصل کیا جا سکے اور اسکی مضبوط خارجہ حکمت عملی کو محفوظ رکھا جا سکے۔''سعید عبداللہ حارب خارجہ حکمت عملی کی تعریف یوں کرتے ہیں

''ھو مجموعة القواعد اللتی تنظم العلاقات بین الدول'' ⁶

خارجہ حکمت عملی ان منظم قواعد کے مجموعے کا نام ہے جو ممالک کے درمیان تعلقات کو استوار کرتے ہیں۔

جس طرح افراد آپس میں روابط و تعلقات کے بغیر زندگی نہیں گزار سکتے ہیں اسی طرح کوئی بھی ریاست دوسری ریاستوں کے ساتھ تعلقات قائم کیے بغیر نہیں رہ سکتی ہے یہی وجہ کہ ریاستیں آپس میں مختلف امور میں تعاون کرتی ہیں ان بین الاقوامی تعلقات کو خارجہ امور کہتے ہیں اور ان تعلقات کی نوعیت کا تعین جس حکمت عملی سے کیا جائے وہ خارجہ حکمت عملی کہلاتی ہے۔اسی طرح جن قواعد کی پابندی میں ریاستوں کے مابین تعلقات قائم ہوتے ہیں انہیں خارجہ حکمت عملی کے اصول یا قانون بین الاقوام کہتے ہیں۔ گویا خارجہ حکمت عملی ایک آزادریاست کے ان اقدامات کے مجموعے کا نام ہے جو ریاست اپنے قومی تشخص اور قومی مفادات کے تحفظ کیلئے اُٹھاتی ہے۔

جبکہ بعض ماہرین فن خارجہ حکمت عملی کو ڈپلومیسی (Diplomacy)کے مفہوم کے ساتھ ملاتے ہیں کیونکہ ڈپلومیسی کے ذریعے بھی کوئی سفیر دوسری ریاست میں رہتے ہوئے اپنی ریاست کے مفادات کا تحفظ کرتا ہے۔

نپولین نے 150سال قبل خارجہ حکمت عملی کو جغرافیہ کے ساتھ مشروط کیا ہے کہ خارجہ حکمت عملی اس ریاست کے جغرافیہ کے مطابق متعین کی جاتی ہے۔

''About 150 years ago Napoleon said that "the foreign policy of a country is determined by its geography"⁷

گویاگزرتے وقت اور بدلتے حالات کے نتیجے میں کسی بھی ملک میں ارباب اقتدار اس ملک کی سلامتی و دفاع ، عالمی تشخص و ثقافتی اقدار ، نظریاتی و جغرافیائی سرحدات کے تحفظ کیلئے وقتاً فوقتاً جو اقدامات بروئےکار لاتے ہیں تاکہ اس کے ذریعے بین الممالک خوشگوار تعلقات استوار کیے جا سکیں ، اسے خارجہ حکمت عملی کہا جائے گا۔

۳۔ خارجہ حکمت عملی یاقانو بین الاقوام کی مختصر تاریخ:

ابتداء میں انسان فطرت کے زیادہ قریب تھاگزرتے وقت کے ساتھ ساتھ تمدن و عمران کے مسائل جوں جوں بڑھتے گئے قدرت نے الہامی یا غیر الہامی طور پرانسان کو اسکا حل بھی بتایاچونکہ افراد و اقوام کے درمیان قویٰ و استعدادمیں تفاوت و اختلاف فطری چیز ہے تو درحقیقت یہی وہ چیز ہے جس نے اولاً افراد پھر اقوام اور قبائل کوباہمی تعلقات و روابط کی لڑی میں پرودیا۔اس فطری استعداد و قویٰ کے اختلاف کے بارے میں قرآن مجید میں ارشاد ہے:

'' وَرَفَعْنَا بَعْضَهُـمْ فَوْقَ بَعْضٍ دَرَجَاتٍ لِّيَتَّخِذَ بَعْضُهُـمْ بَعْضًا سُخْرِيًّا ۗ "⁸

ترجمہ:'' اور ہم نے ہی ان میں سے ایک کو دوسرے پردرجات میں فوقیت دی ہے تاکہ وہ ایک دوسروں سے کام لے سکیں ''⁹

جیسے جیسے انسان تمدنی مسائل سے دوچار ہوتا گیاباہمی روابط وتعلقات کے مراحل کو بھی تدریجاً طے کرتا گیا اور اس ابتدائی دور کے علاوہ جس میں افراد قبائل کی صورت میں رہتے تھے اور اپنے طور پر الگ الگ خود مختار زندگی گزارتے تھے، انسانی تاریخ کا کوئی دور ایسا نہیں گزرا جس میں بین الافراد یا بین الاقوام تعلقات میں ارتقاء پیدا نہ ہوا ہو،گویا تعلقات بین الاقوام کی تاریخ اس اعتبار سے اتنی ہی قدیم ہے جتنی خود انسانی تمدن کی تاریخ قدیم ہے۔جب کوئی فرد کسی بھی جگہ اس توازن کوبرقرار رکھنے میں ناکام رہتاہے توایک اجتماعی قوت حرکت میں آجاتی ہے اورزندگی کی گاڑی رواں دواں رکھنے میں اس فردکی مدد کرتی ہے ۔ یوں انسان نے پہلی مرتبہ افراد اورخاندان کے درمیان توازن ، توافق وتعاون کی ضرورت کومحسوس کیا۔ لہٰذا رفتہ رفتہ جب ریاست کے نام سے ایک '' اجتماعی ادارہ '' معرض وجو دمیں آیا تو یہ مسئلہ نہایت اہمیت کاحامل تھا کہ مختلف اقوام وقبائل میں تعاون وتناظر کی صحیح صورت کیاہونی چاہیے ؟ اورکس طرح ہر قوم اورہر قبیلہ اپنے بنیادی حقوق حاصل کرے ؟ اورکیوں کر زندہ رہے ؟ تواسی احسا س اوراہمیت ہی کی '' کوکھ'' سے خارجہ تعلقات اور خارجہ حکمت عملی نے جنم لیا پھر مختلف تاریخی ، علاقائی اورثقافتی مراحل طے کرتی ہوئی اپنی موجودہ ھیئت کوپہنچی ۔ لیکن تاحال اس حکمت عملی کو قطعی یاحتمی نہیں کہاجاسکتا ہے بلکہ حالات وواقعات کے تقاضوں کے مطابق اس میں تبدیلی پیدا ہوتی رہتی ہے ۔

۴۔عصر حاضر میں قانون بین الاقوام کی اہمیت و ضرورت:

ہر قوم اپنے سیاسی ، اقتصادی ، سماجی و ثقافتی ڈھانچوں سے تشکیل پاتی ہے اور اسی سمت میں سعی کرتی ہے کہ تمام نظام مضبوط اور محفوظ ہوں۔ان نظاموں کی مضبوطی کا تعلق قوم کا اداروں کے متعلق رویوں پر ہوتا ہے جبکہ ان نظاموں کی حفاظت کا تعلق کسی بھی قوم کے ذمہ دار حکمت عملی بنانے والوںکی عقل و فعل پر ہوتا ہے کہ وہ کس طرح تمام حالات میں مثبت اور منفی پہلوؤں کو مدنظر رکھ کراپنی قوم و ملک کے بہترین مفادات کو ملحوظ رکھتے ہوئے قومی مقاصد کے حصول کیلئے ذمہ دارانہ افعال سر انجام دیتے ہیں۔حکومتی ذمہ داران کے ان افعال کے مجموعے کا نام قومی حکمت عملی ہے اور اس قومی حکمت عملی کا وہ حصہ جس کا مقصدریاست کا عالمی برادری میں تشخص برقرار رکھنا اور ریاست کے مفادات کا تحفظ کرنا ہوتا ہے ، وہ خارجہ حکمت عملی کہلاتا ہے گویا کسی بھی ملک کیلئے اسکی خارجہ حکمت عملی اس قدر اہم ہے کہ وہ اس ملک کے عالمی تشخص کی ضامن اور عالمی برادری میں ملکی حیثیت و مقام کو متعین کرتی ہے۔اور اگر خارجہ حکمت عملی سے اغماض برتا جائے یاخارجہ حکمت عملی ناقص بنیادوں پر قائم ہو، تو یہ ملک کو عالمی سطح پر تنہا کرنے کا باعث ہوتی ہے۔

اسی بات کا ادراک کرکے قائداعظم محمد علی جناح نے قیام پاکستان سے قبل 1946 ء میں اس تصور پر زور دیا تھا ۔

''Naturally no nation stands by its self.''¹⁰

''فطری طور پر کوئی بھی قوم صرف اپنے آپ پر اکتفاء نہیں کر سکتی''

دور حاضر میں بھی کسی ملک کی کامیابی اور ناکامی کا انحصار خارجہ حکمت عملی پر کیا جاتا ہے لیکن ترقی یافتہ ممالک میں اس کا محور صرف ذاتی یا قومی مفادات رہ گئے ہیں ۔ اور انہی حکمت عملیوں کی تنفیذ و تعمیل میں وقتی طور پر ان ممالک کے دوستی یا دشمنی کے معیارات تبدیل ہوتے رہتے ہیں ، وہ اپنی مرضی سے جس کو چاہیں دوست ، حلیف یا دشمن بنانے کا اعلان کرتے ہیں۔ جبکہ ایک نظریاتی ملک اگرچہ ترقی پذیر ہی کیوں نہ ہو اسکی خارجہ حکمت عملی اسکے بنیادی نظریات کے ساتھ ہمیشہ مشروط ہوتی ہے اور اس میں وقتی تبدیلیاں بھی ہوں تو نظریاتی مقاصد ہمیشہ ملحوظ ہوتا ہے۔سید صلاح الدین'' پالیسی آف پاکستان '' میں لکھتے ہیں :

''Foreign policy of a country changes under certain compulsion but foreign policy of an ideological state like Pakistan is always conditioned by its ideology.''¹¹

'' خارجہ حکمت عملی خاص حالات کے تحت تبدیل ضرور ہوتی ہے لیکن نظریاتی ملک کی خارجہ حکمت عملی ہمیشہ ملک کے نظریات کے ساتھ مشروط ہوتی ہے۔''

عالمی حالات و واقعات کے پیش نظر اگر ملکی خارجہ حکمت عملی میں عارضی یا مستقل بنیادوں پر ترمیم و تبدیلی کرنا لازمی ہو بھی تو ایک نظریاتی ملک کی خارجہ حکمت عملی میں نظریہ کی اہمیت تمام حالات میں برقرار رہتی ہے، کیونکہ اس کے بغیراس ریاست کیلئے نظریاتی تشخص برقرار رکھنا دشوار ہوجاتا ہے۔

۵۔ قانون بین الاقوام اور گلوبلائزیشن کا تصور:

گلوبلائزیشن کے تصور نے دنیا کے نقشے پر موجود تمام ممالک کو ایک دوسرے سے انتہائی قریب کردیا ہے۔بایں طور کہ ہر ملک آج خود کو بین الاقوامی حالات کے مطابق ڈھالتا ہے کیونکہ کوئی ملک بین الاقوامی حالات کی وجہ سے مثبت یا منفی اثرات سے نہ تو بچ سکتا ہے اور نہ ہی الگ رہ سکتا ہے ۔دوسری طرف حالات اس قدر تیزی سے بدل رہے ہیں کہ بقائے تشخص کیلئے ترقی پذیر ممالک ترقی یافتہ ممالک سے تعلقات رکھنے پر مجبور ہیں یہی وجہ ہے کہ دور جدید میں کسی بھی ملک کی خارجہ حکمت عملی اور خارجہ تعلقات کیلئے بین الاقوامی قانون کی ترتیب نو یا تبدیل کرنے میں نظریاتی اور ثقافتی اقدار کے ساتھ ساتھ سائنسی دور کے جدید تقاضوں کو بھی اہمیت حاصل ہے تاکہ بین الاقوامی حالات کے پیش نظر عالمی سطح پر رائے عامہ کے حصول ممکن ہو اور ملک کا بین الاقوامی قانون مضبوط ہو جس کے تحت ملکی خارجہ حکمت عملی کو مؤ ثر بنایا جا سکے ۔ اس لحاظ سے دور جدید میں ملک کی نظریاتی حیثیت ثانوی حیثیت اختیار کرجاتی ہے اور ہر اس پہلوکو قانون بین الاقوام کے عناصر ترکیبی وخارجہ حکمت عملی میں نمایاں جگہ ملتی ہے جو دو ملکوں کے مابین خارجہ تعلقات اور امن و جنگ کے باہمی رویوں میں لچک پیدا کر سکے۔

۶۔ قانون بین الاقوام اورجدید ذرائع ابلاغ:

چونکہ گلوبلائزیشن سے قبل ذرائع ابلاغ محدود تھے کسی بھی ملک کے دوست یا دشمن ممالک میں رونماہونے والے حالات و واقعات کا علم مہینوں بعد ہوتا تھا اور ان حالات و واقعات کے تاخیر سے علم ہونے کی وجہ سے انکے مثبت و منفی اثرات سے بچنا ناممکن ہوجاتا تھا جبکہ آج دور جدید میں سائنسی ترقی ، ذرائع ابلاغ کی جدت اور مواصلاتی سیاروں کے نظام نے بین الاقوامی سطح پر رونما ہونے والے حالات و واقعات کے بروقت علم کا حصول ممکن و آسان بنادیا ہے گویا اب ہر ملک کی خارجہ حکمت عملی کا محور خلائی تحفظ پر مرکوز ہے جس میں قومی و ملکی سلامتی مضمر ہے لہٰذاہر ملک کی خارجہ حکمت عملی Simultaneously دو اہم مقاصد پر فوکس کرتی ہے۔

١۔ قومی دفاع ٢۔ معاشی ترقی¹²

الحاصل یہ کہ دور جدید کے ترقی یافتہ ممالک میں بین الاقوامی تعلقات اور خارجہ حکمت عملی معاشی معاہدات و قومی دفاع سے تعبیر ہے اور موجودہ دور میں مؤثرو مضبوط خارجہ حکمت عملی کی ضرورت و اہمیت اس قدرہے کہ کوئی بھی ذی شعور اس کا انکار نہیں کرسکتا ہے۔کیونکہ کسی ملک کے خارجہ تعلقات کا قانون بین ا لاقوام سے ہم آہنگ ہونا اس ملک کی کامیاب خارجہ حکمت عملی کےتحت ہی ممکن ہے۔

۷۔ اسلامی قانون سِیریا قانون بین الاقوام کی اسلامی عہد میں بنیادیں :

شریعت اسلامیہ نے جس طرح دیگر شعبۂ ہائے زندگی میں مکمل رہنمائی فراہم کی ہے ، اسی طرح خارجہ تعلقات اور جنگی قوانین سے متعلق قانون سِیربھی شریعت اسلامیہ کے خصائص میں سے ہے۔متقدمین ائمہ نے غیر مسلم (جس بھی قسم کے ہوں ) ،ان سے طے شدہ معاملات ، معاہدات ،تعلقات کو سِیر میں شامل کیا ہے جبکہ متأخرین ائمہ اور عصر حاضر کے علماء نے سِیر کو صرف جنگی قوانین تک محدود کیاہے۔بعثت نبوی ﷺ کے بعد مکہ ہی سے اسلامی ریاست وملت اسلامیہ کی شیرازہ بندی کی شروعات دین ِ اسلام کے عالمگیر مقاصد کے تحت اس آفاقی دعوت کو پورے عالم میں پہنچانے کیلئے جو بنیادی ہدایات رسول اللہ ﷺکی طرف سے جاری کی گئی تھیں (مثلاًاصول ہجرت کا اجرائ، استحکام معاشرہ کیلئے بیعت ، قبائل و وفودکی آمدوغیرہ)، ان سے قانون بین الاقوام کی بنیادیں پڑ چکی تھیں۔ اور ہجرت مدینہ کے بعد تو آپ ﷺ نے باقاعدہ طور پر شعبہ خارجہ کی تنظیم کی تاکہ ان مسلمانوں کو دشمنوں سے مامون و محفوظ رکھا جائے۔عہد خلفائے راشدینؓ میں بھی انہی بنیادی اصولوں کو مدنظر رکھا گیا اور اسلام کے آفاقی پیغام کو پوری دنیا میں پھیلانے کیلئے اسلامی سلطنت کو وسعت دی گئی ۔ اسلامی عہد کے ابتدائی ادوار ہی سے رسول اللہ ﷺ کے غزوات سے متعلق معلومات اور اس سے استنباط کا آغاز ہوا ۔

مشہور تابعی امام شعبی رسول اللہ ﷺکے غزوات کا اتنا علم رکھتے تھے کہ صحابہ کرام ؓ بھی ان کے کمال کے معترف تھے۔پہلی صدی عیسوی کے اختتام تک اسلامی قانون سِیر یعنی '' سِیر و مغازی '' کی باقاعدہ تعلیم کا سلسلہ جاری ہوچکا تھا ۔ اس کی ابتداء امام ابو حنیفہ ؒنے کی اور آپؒ کے شاگروں نے اس باب میں آپ کے علوم کو منضبط کیا اور" اسلامی قانون سِیر" الگ علم کی حیثیت سے مدون شکل میں سامنے آیا ۔اس فن میں قاضی ابو یوسف ؒ کی ''کتاب الخراج '' اور '' الرد علیٰ سیر الاوزاعی'' ، امام محمدؒ کی کتاب'' السیرالکبیر'' اور علامہ سرخسی ؒ کی شرح بنیادی مصادر کی حیثیت کی حامل ہیں ۔یہاں تک کہ سیر و مغازی یا اسلامی عہد کے خارجہ تعلقات کامطالعہ کرنے والا کوئی بھی انسان ان مصادر سے مستغنی نہیں ہوسکتاہے۔

۸۔ اسلامی ریاست کے خارجہ تعلقات کا آغاز:

اسلامی ریاست ایک نظریاتی ریاست ہوتی ہے جو رنگ و نسل ، زبان یا جغرافیہ کی عصبیتوں کی بجائے صرف اصول کی بنیاد پر قائم ہوتی ہے۔اسلامی ریاست کاکام صرف سرحدات اور قومی مفادات کا تحفظ یا نظم و ضبط قائم رکھنا نہیں ہوتا ہے بلکہ یہ ایک نظریاتی ریاست ہوتی ہے جو امن پسندی اور بین الاقوامی عدل پر قائم ہوتی ہے جس کی حدود میں چند ہم خیال ریاستیں یا ملک نہیں بلکہ پوری انسانیت سما جاتی ہے ۔ اور اسلامی ریاست رنگ و نسل ، علاقہ و زبان کے تمام امتیازات کے بغیر عالمی طور پر تمام انسانیت کو دعوت دیتی ہے۔ اسی لیے اللہ تعالیٰ نے قرآن مجید میں بعثت نبوی ﷺ کو بھی عالمی تناظرمیں بیان فرمایا ہے۔ارشاد باری تعالیٰ ہے:

"وَمَآ اَرْسَلْنَاكَ اِلَّا كَآفَّـةً لِّلنَّاسِ بَشِيْـرًا وَّنَذِيْـرًا"¹³

'' ہم نے تمہیں سارے ہی انسانوں کیلئے ایسا رسول بنا کر بھیجا ہے جوخوشخبری بھی سنائے اور خبردار بھی کرے''¹⁴

دین اسلام نے جس طرح بنی نوع انسان کے عام باہمی تعلقات میں ایک طرزفکر اور اصول وقواعد کا مکمل نظام دیا ہے ۔ نبی کریم ﷺ نے مدینہ طیبہ ہجرت کرنے کے بعدباقاعدہ طور پر اسلامی ریاست کی بنیاد رکھی جو جزیرہ ٔعرب تک محدود نہیں بلکہ پورے عالم میں اسلام کا پیغام پہنچانے کے عظیم مقصد کے تحت قائم کی گئی ۔ ایک اسلامی ریاست کی خارجہ حکمت عملی کیلئے بھی دین اسلام کے ایسے اصول نمایاں طور پر کارفرما نظر آتے ہیں جس سے نہ صرف اسلامی ریاست کا نظریاتی اور عالمی ہونا واضح معلوم ہوتا ہے بلکہ اسلامی ریاست کیلئے امن عامہ اور معاشی ترقی کی اہمیت بھی معلوم ہوتی ہے مثلاًایک طرف نجران کے وفد سے دوستانہ ماحول میں جزیہ کی ادائیگی پر معاہدہ کیا گیا تو دوسری طرف مدینہ کے چند یہودی قبائل (بنو نُظیر ، بنو قینقاع ، بنو قریظہ ) سے معاہدہ امن و تعاون کیا گیا جو'' میثاق مدینہ'' کے نام سے مشہور ہے اور تاریخ میں صحیفۂ امن کے طور پر جانا جاتا ہے۔

۹۔ مکی دور کے خارجہ تعلقات :

آپ ﷺ کی خارجہ سیاست اور حکمت عملی دور جدید کے جیو پولیٹکس کے تصور کی طرح محدود نہ تھی بلکہ عالمگیر نوعیت کی حامل تھی اور آپ ﷺ کا مشن تھا کہ اسلام کی دعوت ایک جزیرہ نما عرب سے نکل کر پورے عالم میں پھیل جائے ۔ اس عظیم اور عالمگیر مشن کی تکمیل کیلئے کئی جنگیں اور معرکے بھی ہوئے لیکن ان تمام حالات میں اسلامی ریاست کی نظریاتی بنیادوں کو کبھی نظرانداز نہیں کیا گیا ہے۔اگرچہ مکی دور میں اسلامی ریاست کی حیثیت ریاست در ریاست کی تھی لیکن اس کے باوجود آپ ﷺ نے بیک وقت عقائد و نظریات پر محنت کے ساتھ ساتھ دعوتی خطوط ، قبائل و فود سے ملاقاتیں و تجارتی تعلقات پر بھی باقاعدہ توجہ دی ہے۔

اسلامی ریاست کے مکی دور کے خارجہ تعلقات کے بارے میں ڈاکٹر حمیداللہ لکھتے ہیں :

'' مکہ معظمہ ہی میں آپ ﷺ نے ایک ریاست اندرونی طور پر قائم کی تھی جس کے نتیجے میں اسلامی ریاست کے اقوام عالم کے ساتھ تعلقات بھی قائم کیے۔ اور دین اسلام نے اقوام عالم کے ساتھ خارجہ تعلقات کو بھی روزاول سے ہی اہمیت دی ہے اگرچہ اس کا باقاعدہ آغازہجرت مدینہ کے بعد ہوتا ہوا نظر آتا ہے لیکن در حقیقت اسلامی ریاست کی عالمگیریت اور اس کے عالمگیر مقاصد کیلئے خارجہ تعلقات کا آغاز نبی کریم ﷺ نے ہجرت مدینہ سے قبل مکی دور میں ہی کردیا تھا۔مثلاًمختلف قبائل و وفود کی آمد اور تجارتی اغراض سے تعلقات خصوصاً ایام حج میں ، مکہ سے وفود کا بیرونی ممالک بھیجنا، بیعت عقبہ کے موقع پر وفود کی آمد ، نبی کریم ﷺ کاشاہ حبشہ کو نامہ مبارک بھجوانا ، یہ سب اسلامی ریاست کا بین الاقوامی رابطہ تھا۔ اگرچہ مکہ میں مسلمانوں کی حیثیت ایک مملکت در مملکت کی تھی لیکن یہ تمام روابط ایک زیرتشکیل عالمگیر اسلامی ریاست کے تحت امت مسلمہ کی طرف سے کیے جا رہے تھے جو اپنے سفر کا آغاز اپنے وجود سے قبل کر چکی تھی۔ لہٰذا انہی عمومی ہدایات کو اسلام کے قانون بین الاقوام کا آغاز قرار دیا جا سکتا ہے۔¹⁵

گویاقبل از اسلام خارجہ تعلقات کا وجود صرف اور صرف دفاعی معاہدات یا کوئی اور اہم مشکلات کے حل کا واحد ذریعہ سمجھا جاتا تھا ، جبکہ آپ ﷺ نے خارجہ تعلقات اور اسکی حکمت عملیوں کو ایک منظم شکل دی جس میں نظریہ کی اشاعت اور دعوت دین کے فریضہ کو سب سے زیادہ اہمیت دی گئی ۔آپ ﷺ کے ان خارجہ تعلقات میں یہ بات واضح نظر آتی ہے کہ آپ ﷺ کا مقصد کسی قومی یا ذاتی مفاد کا حصول نہیں تھابلکہ عالمگیر تناظر میں ساری انسانیت کیلئے مساوی پیغام عدل و مساوات تھا جس کے آپ ﷺ شرعی طور پر پابند تھے۔

۱۰۔ مدنی دور کے خارجہ تعلقات :

ریاست مدینہ کے وجود میں آتے ہی نبی کریم ﷺ کے خارجہ تعلقات میں ایک اہم نکتہ اسلام کا غلبہ اور اسکی بالادستی کی راہ میں حائل رکاوٹوں کو ختم کرنا تھا ۔اسی وجہ سے نبی کریم ﷺ یہ ہدایت دیا کرتے تھے کہ پہلے دوسری قوموں کے سامنے اسلام پیش کرو ، اگر اسے قبول نہ کریں تو اس بات کی دعوت دو کہ وہ اسلام کی بالادستی و برتری تسلیم کریں اور اسکے فروغ و نفاذ کی راہ میں رکاوٹ نہ بنیں اور اگر وہ اسلام بھی قبول نہ کریں اور اسکی اشاعت میں رکاوٹ بھی بنیں تو ان سے جہاد کرو ۔ گویا جہاد اور جنگ اسلام قبول نہ کرنے پر نہیں ہے ، بلکہ اسکی راہ میں مزاحم ہونے پر ہے۔اسی غرض سے ہجرت مدینہ کے بعد سب سے پہلا اور اہم کام جو نبی کریم ﷺ کو بطور سربراہ ریاست کرنے کی ضرورت پیش آئی وہ شعبہ خارجہ کی تنظیم تھی کیونکہ آپ ﷺ کے مدینہ طیبہ تشریف آوری کے بعد سب سے اہم کام یہی تھا کہ ان مٹھی بھر مسلمانوں کودشمنوں کے سمندر میں کیسے محفوظ و مامون رکھا جائےاور اسلام کی بالادستی میں حائل رکاوٹوں کو کیسے ختم کیا جائے ، تو اس غرض سےریاست مدینہ کے ارد گرد کے قبائل سے تعلقات و معاہدات ناگزیر تھے۔

بقول ڈاکٹر محمود احمد غازی ؒکے مدینہ منورہ میں باقاعدہ نظم ونسق قائم کرنے کے بعد نبی کریم ﷺ نے مختلف قبائل کے نقباء کی تقرری کے کام کو مکمل فرمایااور اس دستاویز کے بعد جب داخلی نظم و نسق سے ذرا فرصت ہوئی توآپﷺ نے پہلے مرحلے میں ریاست مدینہ کے ارد گرد کے قبائل پر پوری توجہ دی اور ان سے دوستانہ تعلقات قائم کرنے کیلئے رابطوں کا آغاز فرمایا، چنانچہ اس مقصد کیلئے بہت سی مہمات بھی بھیجی گئیں۔اس کے بعد دوسرے مرحلے میں نبی کریم ﷺ نے مدینہ کے چاروں اطراف میں ایک حلقۂ اثر قائم کیا جس کا مقصد اطراف ِ مدینہ میں بسنے والے قبائل کی دشمنیوں کو ختم کرنا، ان کو اسلام کے حق میں مائل کرنااور مسلمانوں سے دوستی کیلئے آمادہ کرنا تھا۔ ان دوستانہ تعلقات و معاہات کے نتیجے میں مدینہ کے دفاع کو منظم کرنے اور مسلمانوں کو داخلی و خارجی طور پر امن و سکون فراہم کرنے میں مدد ملی۔ مثلاً قبیلہ جہینہ ، ضمرہ اور مزینہ کے ساتھ جو معاہدات کیے گئے وہ بھی اسلامی ریاست کے امور خارجہ کی اہم کڑی تھے۔¹⁶

حقیقت یہ ہے کہ اسلامی ریاست کے قیام کے بعد فوراََ آپﷺ نے جس طریقے سے ملک کے خارجہ تعلقات کی طرف توجہ دی اور مختلف ملوک وسلاطین وامراء کی طرف اپنے سفیر اور دعوت نامے بھیجے اس سے ایک طرف اپنی دعوتی سرگرمیوں میں کامیابی حاصل کرلی تو دوسری طرف رسول اکرم ﷺ نے اسلام کی عالمی حیثیت کے قیام کے جس عظیم الشان کام کا آغاز کیا اس کے اثرات عالمی سیاسی حالات پر بھی گہرے پڑے،دور نبویﷺ کی خارجہ حکمت عملی اور خارجہ تعلقات ، تعاون باہمی، خیر سگالی، اور صلح وجنگ کے تھے۔

اسلامی ریاست کی پالیسیاں تمام تر بین الاقوامی زاویوں کا احاط کیے ہوئے تھیں۔ جہاں ضرورت پڑی تو دو طرفہ امداد وتعاون، اقتصادی و نفسیاتی دباؤکی پالیسیاں اختیار کی گئی وہ ان اساسی اصولوں پر مبنی اور حالات واقعات کے مطابق اسلامی ریاست کے مقصد وجودی اور کاز کو تقویت پہنچانے کا باعث بنیں¹⁷

آپ ﷺ کی خارجہ حکمت عملی کے نتیجہ میں اسلامی ریاست مدینہ اور اس کی رعایا ''من حیث القوم'' عالمی سطح پر ایک عالمی طاقت کے طور پر متعارف ہوئے اور خارجی امن کا تحقق اس حد تک ہو گیا کہ اگر ایک عورت مکہ سے صنعاء یمن تک اکیلی اور زیورات سے لدی ہوئی جاتی تب بھی وہ مامون اور محفوظ ہوتی۔ اسلامی ریاست مدینہ نے وفود اور سفارتی تعلقات کے نتیجے میں خارجہ تعلقات میں مذاکرات کی ایسی سنت جاری کی کہ جس کے آداب سے اس وقت کی عالمی طاقتیں واقف نہیں تھیں۔ریاست مدینہ میں آپ ﷺ کے خارجہ تعلقات اور طرزعمل سے ہمیں بنیادی طور پر تین باتیں معلوم ہوتی ہیں جو اس باب میں اہم ہیں ۔