ان کی عورتوں سے شادی کی اجازت کا مطلب یہ ہے کہ اس کے سارے سسرالی رشتہ دار اہل کتاب ہیں اور اس کے بچے کے ماموں خالہ نانا نانی وغیرہ بھی اہل کتاب ہیں۔حقیقت یہ ہے کہ اسلام میں تسامح اور رواداری کی یہ عظیم ترین مثال ہے۔

اہلِ کتاب سے مراد یہود و نصارٰ ی ہیں جیسا کہ قرآن ِ کریم میں واضح ہے اِنہیں کتابی اِس لئے کہا جاتا ہے کہ اِن کی طرف کتابیں نازل ہوئی ہیں جو اِنہیں ایک خدا کی عبادت کی طرف دعوت دیتی ہیں جیسا کہ حضرت موسیٰ علیہ السلام پر تورات اور حضرت عیسیٰ علیہ السلام پر انجیل نازل ہوئی ہے اور شریعتِ مطہرہ میں اِن کے احکام مشرکین سے مختلف ہیں جیسا کہ اہلِ کتاب کا ذبیحہ کھانا اور اُن کی پاکیزہ خواتین کے ساتھ نکاح کرنا جائز ہے جبکہ مشرکین کے ساتھ ایسا کرنا جائز نہیں ہے۔

چنانچہ اللہ رب العزت قرآنِ مجید میں ارشاد فرماتا ہے:

﴿لَا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُمْ مِنْ دِيَارِكُمْ أَنْ تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ﴾ ^[2].

ترجمہ: ’’اﷲتمھیں ان سے منع نہیں کرتا جو تم سے دین میں نہ لڑے اور تمھیں تمھارے گھروں سے نہ نکالا کہ ان کے ساتھ احسان کرو اور ان سےانصاف کابرتاؤ برتو۔ بیشک انصاف والے ،اﷲکو محبوب ہیں‘‘

اسلام اُن کفار کے ساتھ حُسن ِ سلوک کا حکم دیتا ہے کہ جو جنگ نہیں کرتے اور اپنے ہتھیار ڈال دیتے ہیں جبکہ دلی محبت اِن سے حرام ہے کیونکہ دلی محبت کا تعلق باطن کے ساتھ ہوتا ہے اور حُسنِ سلوک کا تعلق ظاہر کے ساتھ ہوتا ہے ۔ چنانچہ شیخ الاسلام ابنِ حجر عسقلانی علیہ الرحمہ(متوفی ۸۵۲ھ) لکھتے ہیں:’’البرُ والصلةُ والإحسانُ لا یستلزمُ التحاببَ والتوادَ المنهيُ عنه ‘‘^[3]’’’’کہ کفارکے ساتھ اچھا سلوک ، صلہ رحمی اور نیکی کرنا ان سے اُس محبت اور دوستی کو مستلزم نہیں کرتا ہے کہ جس سے منع کیا گیا ہے‘‘ ۔

رسول اللہﷺ جہاں پر مسلمانوں کے لئے رحمت و شفقت بنا کر بھیجے گئے وہیں پر آپ ﷺکفار کے ساتھ بھی حُسنِ سلوک کا مظاہرہ فرماتے پھر چاہے حالتِ جنگ ہوتی یاحالتِ امن، ہر حال میں رسول اللہ ﷺ امن کا ساتھ دیتے اور کفار و مشرکین خصوصا اہلِ کتاب کے ساتھ آپ حُسنِ سلوک کا مظاہرہ فرماتے ۔ جب رسول اللہﷺ مدینہ ہجرت فرما کر تشریف لائے تو وہاں پر یہود کی ایک بڑی جماعت موجود تھی جن کے ساتھ رسول اللہﷺ نے معاہدہِ امن فرماکر قیام فرمایا۔ اگر کوئی یہود ی بیمار ہوجاتا تو رسول اللہﷺ اُسکی عیادت کو تشریف لے جاتے ، اگر کسی یہودی کی طرف سے کوئی تحفہ پیش کیا جاتا تو رسول اللہ ﷺ اُسے قبول فرماتے ، اور اگر کوئی یہود ی ظلم کرتا تو آپ ﷺ اُسے معاف فرما دیتے جیسا کہ ایک یہودی عورت نے رسول اللہﷺ کو زہر آلود بکری کا کندھا پیش کیا تو رسول اللہﷺ نے اُسے معاف فرمادیا اور قتل نہ کرنے کا حکم دیا۔ رسول اللہﷺ اِن سے تجارت کرتے ہوئے نرمی کرتے اور اُن پر ظلم نہ کرتے اور ہمیشہ اہلِ کتاب کے ساتھ عاجزی سے پیش آتے۔

معاہدین کے ساتھ حُسنِ سلوک

رسول اللہﷺ کے اکثر غزوات میں اہلِ کتاب جن کے ساتھ معاہدہ ہوتا تو رسول اللہﷺ اُن کے مال ، جان و اولاد سب کے تحفظ کی ضمانت دیتے، اور صحابہِ کرام رضوان اللہ تعالیٰ علیھم اجمعین کو سختی سے اِس بات کا حکم دیتے کہ اِن ذمیوں اور معاہدین کو کسی طرح کا کوئی نقصان نہ پہنچے۔چنانچہ امام بخاری(متوفی 256ھ) اِس ضمن میں ایک حدیث روایت کرتے ہیں:  عَنْ عَبْدِ اللهِ بْنِ عَمْرٍو رضي الله عنهما عَنِ النَّبِيِّ صلی الله عليه وآله وسلم قَالَ: ((مَنْ قَتَلَ مُعَاهَدًا لَمْ يَرَحْ رَائِحَةَ الْجَنَّةِ، وَإِنَّ رِيْحَهَا تُوْجَدُ مِنْ مَسِيْرَةِ أَرْبَعِيْنَ عَامًا))^[4].

’’حضرت عبد اللہ بن عمرو رضی اللہ عنہما سے روایت ہے کہ حضور نبی اکرم صلی اللہ علیہ وآلہ وسلم نے فرمایا: ’’ جس نے کسی معاہد (جن غیر مسلموں کے ساتھ اسلامی حکومت کا معاہدہ ہو) کو (بغیر کسی جرم کے) قتل کیا تو وہ جنت کی خوشبو بھی نہیں سونگھے گا حالانکہ جنت کی خوشبو چالیس برس کی مسافت تک محسوس ہوتی ہے‘‘۔

یہاں معاہد سے مُراد ہر وہ شخص ہے کہ جسے امان یعنی پناہ دے دی گئی ہوعام ازیں کہ وہ جزیہ لے کر دی گئی ہو، بادشاہ کی طرف سے جنگ بندی کی وجہ سے دی گئی ہویا کسی مسلمان نے کسی اہلِ کتاب کو امان دی ہو جیسا کہ علامہ ابنِ حجر عسقلانی رحمہ اللہ مذکورہ حدیث کی شرح میں فرماتے ہیں:’’والمرادُ به منْ لهُ عهدٌ معَ المسلمينَ سواءً كانَ بعقدِ جزيةٍ أو هدنةٍ من سلطانٍ أو أمانٍ منْ مسلمٍ‘‘^[5]۔کہ اِس سے مُراد وہ شخص ہے کہ جسکا مسلمانوں کے ساتھ معاہدہ ہوا ہو عام ازیں کہ وہ جزیہ سے ہو سلطان کی طرف سے جنگ بندی کی وجہ سے ہو یا کسی مسلمان کی طرف سے امان سے ہو۔

یعنی جس شخص نے بغیر کسی جرم کے کسی معاہد کو قتل کیا ، مذکورہ حدیث میں اگرچہ بغیر جرم کے الفاظ ذکر نہیں کئے گئےلیکن مفہوم یہی لئے جارہے ہیں ، اگر معاہد اپنے وعدہ کو توڑتا ہے، یا کسی سازش میں ملوث ہوتا ہے تو اُسے سزا دی جائے گی۔ لیکن سزا حاکمِ وقت دلوائے گا۔ گویا کہ عموما رسول اللہﷺ کسی معاہد کے ساتھ وہی سلوک روا رکھتے کہ جو ایک عام مسلم کے ساتھ ہوتا ، اُسکے نفع و نقصا ن میں شریک ہوتے اور اُسکے دکھ سکھ کو بانٹے ، لیکن اگر وہ ظلم کرتا یا اپنی حدود سے نکلتا تو اُسے سزا دی جاتی۔

اہلِ کتاب کی پراپرٹی کوواپس کرنا

رسو ل اللہﷺ کی یہ شان تھی کہ آپ ﷺ ناحق کسی کا مال قبضہ نہ کرتے اور نہ ہی اِسکا حکم صادر فرماتے، بلکہ اگر آپ ﷺ کو معلوم ہوتا کہ یہود و نصریٰ کا مال مسلمانوں نے ناحق قبضہ کر رکھا تو آپ ﷺ اُسے فورا واپس کرنے کے احکامات صادر فرماتے۔ ایسا ہی ایک واقعہ غزوہِ خبیر کے موقع پر پیش آیا کہ جب رسول اللہﷺ اپنا لشکر لے کر خبیر کی طرف روانہ ہوئے تو لوگوں نے شور مچانا شروع کردیا کہ رسول اللہﷺ لشکر لے کر آگئے قلعے کے دروازے بند ہوگئے مگر وہاں پر ایک حبشی ملا جو خبیر والوں کی بکریاں چرایا کرتاتھا ، جب یہودی جنگ کی تیاریاں کرنے لگے تو اُس نے پوچھا کہ آخر تم لوگ کس سے جنگ کے لئے تیاریاں کررہے ہو ؟ یہودیوں نے کہا:’’ کہ آج ہم اس شخص سے جنگ کریں گے جو نبوت کا دعویٰ کرتا ہے۔ یہ سن کر اُس کے دل میں حضور صلی اللہ تعالیٰ علیہ وسلم کی ملاقات کا جذبہ پیدا ہوا۔ چنانچہ یہ بکریاں لئے ہوئے بارگاہ رسالت میں حاضر ہو گیا اور حضور صلی اللہ تعالیٰ علیہ وسلم سے دریافت کیا :’’کہ آپ کس چیز کی دعوت دیتے ہیں ؟ آپ صلی اللہ تعالیٰ علیہ وسلم نے اُس کے سامنے اسلام پیش فرمایا۔ اُس نے عرض کیا :’’کہ اگر میں مسلمان ہو جاؤں تو مجھے خداوند تعالیٰ کی طرف سے کیا اجر و ثواب ملے گا ؟ آپ صلی اللہ تعالیٰ علیہ وسلم نے ارشاد فرمایا :’’کہ تم کو جنت اور اس کی نعمتیں ملیں گی‘‘۔ اُس نے فوراً ہی کلمہ پڑھ کر اسلام قبول کر لیا۔ پھر عرض کیا کہ یا رسول اللہ ! صلی اللہ تعالیٰ علیہ وسلم ’’یہ بکریاں میرے پاس امانت ہیں‘‘۔ اب میں ان کو کیا کروں ؟ آپ صلی اللہ تعالیٰ علیہ وسلم نے فرمایا:’’ کہ تم ان بکریوں کو قلعہ کی طرف ہانک دو اور ان کو کنکریوں سے مارو۔ یہ سب خود بخود اپنے مالک کے گھر پہنچ جائیں گی‘‘۔ چنانچہ یہ حضور صلی اللہ تعالیٰ علیہ وسلم کا معجزہ تھا کہ انہوں نے بکریوں کو کنکریاں مار کر ہانک دیا اور وہ سب اپنے مالک کے گھر پہنچ گئیں^[6]۔

رسول اللہ ﷺ نے کس خوبصورت انداز میں خبیر کے یہود کی بکریوں کو واپس لوٹانے کا حکم فرمایاورنہ رواج کے مطابق اگر چاہتے تو وہ سب رکھ لیتے لیکن یہ ظلم اور غصب ہوتا جبکہ رسول اللہﷺ کو اللہ نے ہر عیب سے پاک پیدا فرمایا ہے ۔ اِسی لئے تو تاجدارِ انبیاء ﷺ نے اُس حبشی غلام کو کہا کہ یہ بکریاں قلعے کی طرف ہانک دو اور وہ سب بکریاں قلعے پہنچ گئیں اور وہ حبشی غلام کلمہ پڑھ کر مسلمان ہوگیا اور رسول اللہﷺ کی طرف سے لڑتے لڑتے شہید ہوگیا۔ یہ رسول اللہﷺ کا اعلیٰ اخلاق تھا کہ آپ ﷺنے حالت جنگ میں ایک دشمن کی بکریاں اسے واپس دلوا کر یہ تعلیم دی کہ جنگ اپنے مقام پر ہے جبکہ دیانت و امانت اپنے مقام پر ہے۔ صلح و جنگ اور دیانت و انصاف کے تقاضوں کو بیک وقت ملحوظ رکھنا ضروری ہے۔

جان کی دشمن یہود ی عورت کو معافی

امام بخاری(متوفی 256ھ) اپنی صحیح میں لکھتے ہیں:

عَنْ أَنَسٍ رضي الله عنه أَنَّ امْرَأَةً يَهُوْدِيَةً أَتَتْ رَسُوْلَ اللهِ صلی الله عليه وآله وسلم بِشَاة مَسْمُوْمَة، فَأَکَلَ مِنْهَا، فَجِيئَ بِهَا إِلٰی رَسُوْلِ اللهِ صلی الله عليه وآله وسلم، فَسَأَلَهَا عَنْ ذَالِکَ؟ فَقَالَتْ: أَرَدْتُ لِأَقْتُلَکَ، قَالَ: مَا کَانَ اللهُ لِيُسَلِّطَکِ عَلٰی ذَاکِ، قَالَ: أَوْ قَالَ: عَلَيَّ، قَالَ: قَالُوْا: أَ لَا نَقْتُلُهَا؟ قَالَ: لَا، قَالَ: فَمَا زِلْتُ أَعْرِفُهَا فِي لَهَوَاتِ رَسُوْلِ اللهِ صلی الله عليه وآله وسلم ^[7].

حضرت انس رضی اللہ عنہ بیان کرتے ہیں کہ ایک یہودی عورت حضور نبی اکرم صلی اللہ علیہ وآلہ وسلم کے پاس بکری کا زہر آلود گوشت لے کر آئی، آپ صلی اللہ علیہ وآلہ وسلم نے اُس گوشت میں سے تھوڑا سا کھایا ، پھر اُس عورت کو آپ صلی اللہ علیہ وآلہ وسلم کے پاس لایا گیا، آپ صلی اللہ علیہ وآلہ وسلم نے اُس عورت سے اِس گوشت کے متعلق پوچھا تو اُس نے کہا: ’’ میں نے آپ کو قتل کرنے کا ارادہ کیا تھا‘‘، آپ صلی اللہ علیہ وآلہ وسلم نے فرمایا: ’’اللہ تعالیٰ تجھے اِس پر قادرنہیں کرے گا‘‘۔ راوی بیان کرتے ہیں: یا آپ صلی اللہ علیہ وآلہ وسلم نے فرمایا: مجھ پر قادر نہیں کرے گا۔ صحابہ کرام نے عرض کیا: (یا رسول اللہﷺ!) کیا ہم اِسے قتل نہ کر دیں؟ آپ صلی اللہ علیہ وآلہ وسلم نے فرمایا: نہیں (اور اس یہودی عورت کو معاف فرما دیا)۔ راوی کہتے ہیں کہ اُس زہر کا اثر آپ صلی اللہ علیہ وآلہ وسلم کے منہ میں ہمیشہ پایا گیا۔

یہ واقعہ غزوہِ خیبر کے موقع پر پیش آیا جیسا کہ امام بخاری(متوفی 256ھ) نے کتاب المغازی میں غزوہِ خیبر کے باب میں اِس واقعہ کو درج فرما کر اور علامہ ابنِ حجر عسقلانی و دیگر شراحِ حدیث نے اِسکی وضاحت فرماکر واضح کر دیا ہے اوراُس عورت کا نام زینب بنت الحارث تھا جو کہ سلام بن مشکم کی بیوی تھی اور خبیر کے پہلوان مرحب کی بہن تھی ۔ اِس عورت کے قتل میں اختلاف پایا جاتا ہے اصح یہ ہے کہ رسول اللہﷺ نے اِسے معاف فرمادیا اور قتل کرنے کا حکم صادر نہیں فرمایا۔

لیکن آخر وقت تک اُس زہر آلود گوشت کا اثر رسول اللہﷺ کے اندر رہا ، مگر تاجدارِ انبیاءﷺ کااعلیٰ اخلاق دیکھیں کہ ایک یہودی عورت جنگ کے وقت آپ ﷺ کو نعوذباللہ شہید کرنے کی کوشش کرتی ہے اور کسی حد تک کامیاب بھی ہوتی ہے مگر رسول للہﷺ افاقہ پانے کے بعد اُسے معاف فرمادیتے ہیں ۔ یہ اہلِ کتاب کے ساتھ رسول اللہ ﷺ کے اعلیٰ اخلاق کا نمونہ تھا کہ ایک دشمن کی بیوی اور ایک دشمن کی بہن کو معاف فرمادیا۔

غیر مسلمین کے ساتھ ہمارا رویہ سنجیدہ اور نہایت عمدہ ہونا چاہئے ۔ اور ضرورت اِس امرکی ہے کہ مسلمانوں کے اذہان میں اِس سلسلے میں غلط فہمیاں پائی جاتی ہیں ، جسکا خاتمہ از حد ضروری ہے اور اسلام کا صحیح مؤقف پیش کرنے کی ضرورت ہے۔ بعض شدت پسند مسلمانوں کا کفار و غیر مسلمین کے ساتھ رویہ انتہائی نازیبا ہوتا ہے جو اُن کا اپنا ذاتی عمل ہوتا ہے نہ کہ اسلام کا ۔اور غیر مسلمین یہ سمجھتے ہیں کہ شاید اسلام کا ہی بتایا ہوا یہ دین و تہذیب ہے جبکہ ایسابالکل بھی نہیں ہے۔ بحیثیت مسلم ہمیں یہ سمجھنا اور جاننا چاہئے کہ انسان ہونے کے ناطے ہر شخص کی عزت و آبرو کی حفاظت کرنا ضروری ہے ۔خواہ اُسکا تعلق کسی بھی مذہب، دین ، قوم اور مسلک سے ہو۔چونکہ اللہ تعالیٰ نے ہر انسان کو محترم و مکرم پیدا کیا ہے اِس لئے ہم پر لازم ہے کہ ہم ہر انسان کی عزت کریں ۔

رسول اللہ ﷺ کے سامنے سے اگر کسی یہودی کا بھی جنازہ گزرتا تو آپ کھڑے ہوجاتے۔ اور پوچھنے پرفرماتے :’’ کیا یہ انسان نہیں ہے؟ گویا کہ رسول اللہﷺ کے نزدیک عزت کے لائق ہر انسان ہے۔رسول اللہﷺ اہلِ کتاب کے ساتھ کئے گئے معاہدے کی خلاف ورزی نہ فرماتے بلکہ اگر کوئی خلاف ورزی کرتا بھی تو اُسے معاف فرمادیتے۔ رسول اللہﷺ معاہد کے ساتھ ہمیشہ نرمی اور حُسنِ سلوک روارکھنے کی تلقین فرماتے اور حکم دیتے کہ کوئی کسی معاہد کو قتل نہ کرے ورنہ اُسے جنت کی خوشبو سے بھی محروم کر دیا جائے گا۔ آپ ﷺ اہلِ کتاب خصوصا یہود و نصاریٰ کے بچوں اور خواتین کے ساتھ نرمی کا حکم دیتے ۔ اور اگر کوئی یہودی اور عیسائی اسلام قبول کرتے تو آپ ﷺ اُنکے غیر مسلمین آقاؤں کے اموال کو فوراً واپس کرنے کا حکم دیتے جو بھی اُن کے پاس ہوتے ۔جیسا کہ غزوہِ خیبر کے موقع پر ایک غلام مسلمان ہوا تو اُسکے پاس خیبر والوں کی بکریاں تھیں تو رسول اللہ ﷺ نے اُسے وہ بکریاں فورا قلعے کی طرف ہانکنے کا حکم دیا ۔ یہ رسول اللہﷺ کا عمدہ اخلاق تھا کہ آپ ﷺ حالتِ جنگ میں بھی غیر مسلمین کے اموال کو غصب کرنے کا کبھی نہ سوچتے ؛ کیونکہ یہ ظلم ہے اور اللہ کے انبیاء ظلم نہیں کرتے اور نہ ہی کسی کا مال باطل طریقے سے کھاتے ہیں۔

حتیٰ کہ رسول اللہﷺ اپنے دشمنوں کو بھی معاف فرمادیتے جیسا کہ ذکر کیا کہ ایک کتابیہ عورت نے رسول اللہﷺ کو زہر دینے کی گھٹیا سازش کی اور رسول اللہﷺ کو اُس نے زہر کھلابھی دیا مگر رسول اللہﷺ نے اُس یہودی عورت کو معاف فرمادیا۔ حالانکہ در اصل وہ رسول اللہﷺ کو شہید کرنے کے ذہن سے آئی تھی۔ رسول اللہﷺ ہمہ وقت انسانیت سے پیار کرنے کا حکم دیتے اور ہر ایک سے اُنسیت و محبت کا درس دیتے۔ اور یہ بھی جائز نہیں کہ کسی شخص کو جبراً اور ظلماً مسلمان کیا جائے ، اسلام امن کا دین ہے اور امن سے ہی پھیلا ہے۔ تاریخ گواہ ہے جب بھی اسلام پھیلا تو اپنے اخلاقِ حسنہ سے پھیلا ہے ۔جس طرح لوگ آج کل دھماکے اور بچوں کو قتل کر کے اسلام پھیلانے کو کوشش کرتے ہیں۔ ایسے کبھی اسلام نہیں پھیلے گا۔

ہر مسلم کا یہ عقیدہ ہونا چاہئے کہ اللہ رب العزت نے عدل و انصاف اور اخلاقِ حمیدہ کو اپنانے کا حکم دیا ہے اور اخلاقِ رذیلہ سے رُکے رہنے کا حکم دیا ہے۔اللہ رب العزت ظلم وستم اور بداخلاقی کا حکم نہیں دیتا خواہ معاملہ کفار کے ساتھ ہو یا مسلمان کے ساتھ ۔ جیسا کہ قرآنِ حکیم میں بھی ارشادِ باری تعالیٰ کا خلاصہ ہے کہ ’’کسی قوم کی دشمنی تمہیں اتنا نہ اُبھارے کہ تم عدل و انصاف سے ہی پھر جاؤ بلکہ فرمایا تم عدل کرو اور یہ خُدا ترسی کے زیادہ لائق ہے۔

کسی بھی اسلامی ریاست میں رہنے والی غیر مسلم اقلیت کو اسلام کی اصطلاح میں ذمی کہا جاتا ہے ۔ذمی کا مطلب یہ ہے کہ اب وہ اللہ اُسکے رسول اور مسلمانوں کی پناہ میں آگئے ہیں ۔اب اُن کی حفاظت مسلمانوں کے پاس ہے اُن کی جان و مال و آبرو کی حفاظت کرنا ضروری ہے۔ نجران سے ایک عیسائی وفد حضور صلی اللہ علیہ وسلم  سے ملاقات کی غرض سے مدینہ آیا۔حضور صلی اللہ علیہ وسلم  اور صحابہ کرام رضوان اللہ عنھم اجمعین  اس وقت عصر کی نماز سے فراغت کے بعد مسجد نبوی ہی میں تشریف فرماتھے۔اسی درمیان میں عیسائیوں کی عبادت کا وقت ہوگیا۔چنانچہ وہ عیسائی مسجد نبوی کے اندر اپنی عبادت کرنے لگے۔صحابہ کرام رضوان اللہ عنھم اجمعین  انھیں روکنے کے لیے آگے بڑھے لیکن حضور صلی اللہ علیہ وسلم  نے فرمایا کہ  انھیں اپنی عبادت کرنے دو۔چنانچہ مسجد نبوی کےاندر ان عیسائیوں نے اپنی عبادت ادا کی۔ یہ رسول اللہﷺ کا اعلیٰ اخلاق تھا ۔ دُنیامیں جتنے بھی مذاہب پائے جاتے ہیں اُن میں انتہاء پسندی عروج پر ہے مگر اسلام امن کا گہوارہ ہے ۔

قرآن وحدیث کی واضح تعلیمات اورحضور صلی اللہ علیہ وسلم ،صحابہ کرام رضوان اللہ تعالیٰ عنھم اجمعین  اور تابعین رحمۃ اللہ علیہم  کے عملی نمونوں کو دیکھ کر یہ سمجھنا کس قدر آسان ہے کہ اسلام نے غیر مسلموں کے ساتھ اچھا سلوک کرنے کا حکم دیا ہے اور خاص کر ان غیر مسلموں کے ساتھ جو کسی اسلامی ملک میں اقلیت کی حیثیت رکھتے ہیں۔غور کریں کہ جب کسی اسلامی ملک میں غیر مسلم اقلیت کے ساتھ اچھے برتاؤ کی اتنی تاکید ہے تو کسی کافر ملک میں مسلم اقلیت کے لیے یہ بات کس قدراہم ہے کہ وہ غیر مسلم اکثریتی فرقہ کے ساتھ اچھے اخلاق کا مظاہرہ کریں۔ذرا سوچیں تو سہی کہ اگر ہم غیر مسلموں کے ساتھ دشمنوں جیسا سلوک کریں گے اور ان کے ساتھ بداخلاقی کا مظاہرہ کریں گے تو پھر ہم کس منہ سے غیر مسلموں سے کہہ سکیں گے کہ اسلام اچھے اخلاق کا حکم دیتا ہے۔اور اسلام بہت اچھا مذہب ہے ۔ہم کیسے انھیں اسلام کی طرف راغب کرسکیں گے۔ہماری بداخلاقی دیکھ کر تو وہ اور بھی ہم سے دور ہوجائیں گے،ہم سے نفرت کریں گے اور ہمارے دشمن بن جائیں گے اورآج کل یہی کچھ ہورہاہے۔

غزواتِ نبویہ ﷺ میں کفارو مشرکین کے ساتھ اخلاقِ حسنہ کے مظاہر

رسول اللہﷺ نہ صرف مسلمانوں بلکہ کفار و مشرکین کے ساتھ بھی حُسنِ سلوک کا مظاہرہ فرماتے۔حالتِ جنگ ہو یا امن ، ہر حال میں رسول اللہﷺ کفار و مشرکین کے ساتھ اخلاقِ حسنہ کے ساتھ پیش آتے۔ حضورﷺنے غیر مسلموں سے حسن سلوک رواداری اور ان کے حقوق کا تحفظ صرف عام حالات میں ہی نہیں کیا بلکہ جنگ کی حالت میں بھی اس کا عملی نمونہ پیش کرکے دکھایا جس میں آج بھی قومیں ہر طرح کی فریب دہی جائز سمجھتی ہیں اور کوئی موقع ہاتھ سے دشمن کو پسپا کرنے کا نہیں جانے دیتیں اس جنگی حالت میں بھی حضور نے حسن سلوک کی ایسی اعلیٰ مثالیں قائم کیں کہ انسانی عقل جنہیں دیکھ کے دنگ رہ جاتی ہے۔

رسول اللہ ﷺ اپنے دشمن کفار و مشرکین کے بچوں کے ساتھ بھی پیار فرماتے، اُن کے بیماروں کی تیماداری کرتے، اُن کی خواتین کی حفاظت فرماتے، حالتِ جنگ میں بھی اپنے دشمنوں کے ساتھ نرمی کا برتاؤ کرتے۔ رسول اللہﷺ کی شدیدخواہش ہوتی کہ کفار کے لئے دعائے رحمت کی جائے ؛تاکہ وہ خدا کی توحید کی تبلیغ کا پیغام سُنیں، اور حقیقت کو سمجھیں ، اِسی لئے رسول اللہ ﷺ ہمیشہ کفار کے لئے دعا فرماتے۔ اب ذیل میں چند ایسی امثلہ پیش کی جارہی ہیں کہ جن میں رسول اللہﷺ کا کفار و مشرکین کے ساتھ حالتِ جنگ یا جنگ کے زمانہ میں حُسنِ سلوک کا مظاہرہ کیا گیا۔

حضرت دعثور کے قبول ِ اسلام کاواقعہ

جب رسول اللہﷺ غزوہِ ذی امر یا غزوہِ غطفان کے لئے تشریف لے کر جا رہے تھے تو اُس وقت بنو ثعلبہ اور بنو محارب کی فوج کا سپہ سالار نجد کا مشہور بہادر دعثور بن حارث محاربی 450 افراد کا لشکر لے کر پہاڑوں میں چھپ گیا اورحضور ﷺایک درخت کے نیچے لیٹ کر اپنے کپڑے سکھانے لگے۔ پہاڑ کی بلندی سے کافروں نے دیکھ لیا کہ آپ بالکل اکیلے اور اپنے اصحاب سے دور ہیں، ایک دم دعثور بجلی کی طرح پہاڑ سے اتر کر ننگی شمشیر ہاتھ میں لیے ہوئے آیااور حضور ﷺ کے سرِ انور پر ۰تلوار بلند کرکے بولا کہ:’’ بتائیے اب کون ہے جو آپ کو مجھ سے بچا لے؟ آپ ﷺنے جواب دیا :’’کہ میرا اﷲ مجھ کو بچا لے گا‘‘۔ تلوار اس کے ہاتھ سے گر پڑی اور دعثور کانپنے لگ گیا۔ رسول اﷲﷺ نے فوراً تلوار اٹھا لی اور فرمایا :’’کہ بول اب تجھ کومیری تلوار سے کون بچائے گا؟ دعثور نے کانپتے ہوئے بھرائی ہوئی آواز میں کہا:’’ کہ کوئی نہیں‘‘۔ رحمۃ للعالمینﷺ کو اس کی بے کسی پر رحم آ گیااور آپ نے اس کا قصور معاف فرما دیا۔ دعثور اس اخلاقِ نبوت سے بے حد متاثرہوااور کلمہ پڑھ کر مسلمان ہو گیااور اپنی قوم میں آ کر اسلام کی تبلیغ کرنے لگا۔^[8]

یہ رسول اللہﷺ کا ایک غیر مسلم سپہ سالار کے ساتھ حُسنِ سلوک تھا کہ جب اُسے تلوار بے نیام رسول اللہﷺ کی گردن پر رکھ دی تھی گویا اب اُسکا خون حلال ہوگیا تھا مگر تاجدارِ انبیاء ﷺنے اُسے معاف فرمادیا، اور نتیجہ یہ نکلا کہ دعثور کہ جو ایک وقت میں کفار کی فوج کا سالار تھا، کلمہ پڑھ کر دائرہِ اسلام میں داخل ہو کر تبلیغِ اسلام میں لگ گیا اور یوں دعثور سے حضرت دعثور رضی اللہ تعالیٰ عنہ پکارا جانے لگا، اور اِس واقعہ سے یہ بھی معلوم ہوا کہ ہر وقت ہر شخص کو اللہ رب العزت کی ذات پر بھروسہ رکھنا چاہئے اور اپنے مشکلات میں اُسے ہی یاد کرنا چاہئے، تاکہ ہر مصبیت سے چھٹکارا پایا جا سکے۔ اور یہ ایمان کا بلند ترین مقام ہے۔

کفار کے لئے دعائے ہلاکت نہ کرنا

رسول اللہﷺ کو اللہ رب العزت نے نہ صرف مسلمانوں بلکہ تمام انسانیت کے لئے رحمت بنا کر مبعوث فرمایا آپ ﷺ اپنے دشمنوں کے لئے دعائے ہلاکت نہ فرماتے جبکہ اِسکے برعکس اگر دوسرے انبیائے کرام کو دیکھا جائے تو جب وہ اپنی قوم کے ظلم و ستم سے تنگ آتے یا تو اُنہیں چھوڑ کر چلے جاتے جیسا کہ حضرت یونس علیہ السلام نے کیا یا پھر اپنی قوم کی تباہی و بربادی کی دعا کر دیتے جیسا کہ حضرت نوح علیہ السلام نے کیا کہ آپ نے اپنی قوم سے تنگ آکر اُن کی ہلاکت کی دعا کی جیسا کہ قرآنِ مجید میں ہے: ﴿وَقَالَ نُوحٌ رَبِّ لَا تَذَرْ عَلَى الْأَرْضِ مِنَ الْكَافِرِينَ دَيَّارًا﴾⁹’’ اور نوح نے کہا اے اللہ ! زمین پر کسی کافر کے گھر کو مت چھوڑ‘‘ یعنی اُنہیں تباہ وبرباد فرما ۔ جبکہ رسول اللہﷺ ایسا نہ فرماتے بلکہ کفار کی ہدایت کی دعا فرماتے اور فرماتے اے صحابہ مجھے اِن کفار کی نسل سے فرماں بردار نظر آرہےہیں۔ چنانچہ مام ترمذی(متوفی 279ھ) اپنی سُنن میں لکھتے ہیں:

’’ عَنْ جَابِرٍ، قَالَ: قَالُوا: يَا رَسُولَ اللهِ أَخْرَقَتْنَا نِبَالُ ثَقِيفٍ فَادْعُ اللَّهَ عَلَيْهِمْ. قَالَ: ((اللَّهُمَّ اهْدِ ثَقِيفًا))^[10].

’’حضرت جابر رضی اللہ تعالیٰ عنہ سے روایت ہے کہ لوگوں نے کہا:’’ یا رسول اللہﷺ ! قبیلہ بنو ثقیف کے تیروں نے ہمیں چھلنی کر دیا ہے ، آپ اُن کے لئے دعائے ہلاکت فرمائیں، تو رسول اللہﷺ نے یوں دعا فرمائی:’’ اے اللہ ! تو ثقیف کو ہدایت عطا فرما‘‘۔

یہ واقعہ غزوہِ طائف میں محاصرہ کے دوران پیش آیا، لیکن رسول اللہﷺ نے بجائے اُن کی ہلاکت کے اُن کے اسلام میں داخل ہونے کے لئے اللہ کی بارگاہ میں دعا فرمائی۔ یہ رسول اللہﷺ کا اعلیٰ اخلاقی نمونہ تھا جہاں پر بنو ثقیف کی وجہ سے کئی مسلمان زخمی ہوگئے اور شہید بھی ہوگئے وہیں پر رسول اللہﷺ کی رحمت و محبت جوش ماررہی تھی اور آپ ﷺ اِن کفار کو معاف فرما رہے تھے۔ اور اُن کی اسلام میں شمولیت کی دعا کر ررہے تھے۔ کیونکہ اللہ کا نبی لوگوں کو مارنے مروانے کے لئے نہیں آتا بلکہ اُنہیں جہنم سے بچانے کے لئے آتا ہے۔

رسول اللہ ﷺ کفار کے خلاف دعا ئے ہلاکت کرنے سے بچتے اور اگر آپ سے کہا جاتا کہ آپ اُن کے خلاف دعائےہلاکت کریں تو آپ ﷺ فرماتے :’’ مجھے رحمت بنا کر بھیجا گیا ہے نہ کہ لعنت بھیجنے والا چنانچہ اما م مسلم حدیث ذکر کرتے ہیں:

’’ عَنْ أَبِي هُرَيْرَةَ رضي الله عنه قَالَ: قِيْلَ: يَا رَسُوْلَ اللهِ، اُدْعُ عَلَی الْمُشْرِکِيْنَ، قَالَ: ((إِنِّي لَمْ أُبْعَثْ لَعَّانًا، وَإِنَّمَا بُعِثْتُ رَحْمَةً))^[11]

’’حضرت ابو ہریرہ رضی اللہ عنہ بیان کرتے ہیں کہ حضور نبی اکرم صلی اللہ علیہ وآلہ وسلم سے عرض کیا گیا: (یا رسول اللہ!) مشرکین کے خلاف دعائے ہلاکت کیجئے، آپ صلی اللہ علیہ وآلہ وسلم نے فرمایا:’’ مجھے لعنت کرنے والا بنا کر مبعوث نہیں کیا گیا، مجھے تو صرف (سراپا) رحمت بنا کر بھیجا گیا ہے‘‘۔

کس طرح خوبصورت انداز میں رسول اللہﷺ نے صحابہِ کرام کو دعائے ہلاکت کرنے سے منع فرمادیا کہ مجھے لعنت کرنے والا بنا کر نہیں بھیجا گیا بلکہ سراپا رحمت اور شفقت بنا کر مبعوث کیا گیا ہے، جس کی شان ہی رحمت وشفقت ہو وہ بھلا کیسے دعائے ہلاکت کے لئے ہا تھ بلند کر سکتا ہے اور اگر کہیں پر رسول اللہﷺ نے دعائےہلاکت کی تو وہ بحکمِ خداوندی تھا جو کہ وحی کے ذریعے سے آپ ﷺ کو حکم دیا گیا تھا۔ اِنہی اخلاقیات کا نتیجہ ہے اور اخلاص کا فیض ہے کہ جان کے دشمن بھی نسل در نسل آپ ﷺکی غلامی میں آگئے۔

کفار کو حالتِ جنگ میں پانی فراہم کرنا

رسول اللہﷺ نہ صرف حالتِ امن میں بلکہ حالتِ جنگ میں بھی اپنے دشمنوں کے ساتھ نرمی کا سلوک رکھتے، اگر اُنہیں کسی چیز کی ضرورت ہوتی تو آپ ﷺ اُنہیں پیش فرماتے، چنانچہ جب غزوہ ِ بدر کے موقع پر کفار کے پاس پانی نہیں تھا تو رسول اللہﷺ کے قبضہ میں موجود کنویں سے اگر کفار پانی لینا چاہتے تو رسول اللہﷺ اُنہیں پانی عطا فرماتے جیسا کہ ابن ہشام اپنی سیرت میں لکھتے ہیں:’’کہ جب جنگِ بدر کے موقع پر رسول اللہﷺ کا لشکر پانی کے پڑاؤپر تھا تو اگر دشمن کے لوگ پانی لینے آتے تو آپ ﷺ اُنہیں اجازت دے دیتے اور وہ پانی لے کر واپس چلے جاتے‘‘^[12]۔

تاجدارِ انبیاء خاتم النبین ﷺ دشمن سے اگر لڑتے تو اللہ کی رضا کے لئے لڑتے ، کبھی اپنے نفس کے لئے لڑائی نہیں کی اور نہ ہی تلوار کو نکالا۔اگر دشمن بھوکا ہوتا تو آپ ﷺ اُنہیں کھانا عطا فرماتے ، اگر وہ پیاسا ہوتاتو اُسے پانی دیا جاتا۔ کتنےغیر مسلم صرف رسول اللہﷺ کااعلیٰ اخلاق ہی دیکھ کر کلمہ پڑھ کر اسلام میں داخل ہوجاتے۔ جنگ میں عمومی حالات کی بنسبت حالتِ غضب میں سخت اور کئی ناجائز اُمور بھی جائز سمجھے جاتے ہیں لیکن سراپارحمت نبی ﷺ نے حالتِ جنگ میں اپنی کرم نوازیوں میں اضافہ فرمایا اور اِس طرح دشمنوں کے دل جیت لئے۔

حالتِ جنگ میں مثلہ سے منع کرنا

رسول اللہﷺ اپنے اصحاب کو ہمیشہ مثلہ کرنے سے منع فرماتے جبکہ اہلِ عرب میں مثلہ کرنے کو باعثِ افتخار سمجھا جاتا تھا ۔ علامہ ابنِ اثیر جزری (متوفی 606ھ) لکھتے ہیں:

’’ومثلةٌ بالقتيلِ، إذا جدعت أنفُهُ، أو أذنُهُ، أو مذاكيرهُ، أو شيئاً من أطرافِه‘‘¹³

’’مقتول کو مثلہ کرنے سے مُراد اُسکا ناک، کان یااُسکے اعضائے جنسی یا جس کے کی حصے کو کاٹنا’’ مثلہ‘‘ کہلاتا ہے‘‘۔

عَنْ سُلَيْمَانَ بْنِ بُرَيْدَةَ، عَنْ أَبِيهِ، أَنَّ النَّبِيَّ صَلَّى اللهُ عَلَيْهِ وَسَلَّمَ قَالَ: ((اغْزُوا بِاسْمِ اللهِ، وَفِي سَبِيلِ اللهِ، وَقَاتِلُوا مَنْ كَفَرَ بِاللَّهِ، اغْزُوا وَلاَ تَغْدِرُوا، وَلاَ تَغُلُّوا، وَلاَ تُمَثِّلُوا ...))^[14]

حضرت سلیمان بن بُریدہ اپنے والد سے روایت کرتے ہیں کہ رسول اللہﷺ نے فرمایا:’’ خدا کے نام پر خدا کی راہ میں جہاد کرو خدا کے منکروں سے اور نہ مثلہ کرو نہ بدعہدی نہ خیانت ‘‘۔

اہلِ عرب کے نزدیک یہ عام تھا کہ حالتِ جنگ میں غصہ کی بناء پر اپنےمخالف کو قتل کرنے کے بعد اُسکےجسمانی اعضاء کاٹ دئیے جاتے جیسا کہ حضرت سیدنا امیرِ حمزہ رضی اللہ تعالیٰ عنہ کے ساتھ بدتر سلوک کیا گیا، تو رسول اللہﷺ نے اپنے پیروکاروں کو اِس سے سختی سے منع کرتے ہوئے ارشاد فرمایا: ’’وَلاَ تُمَثِّلُوا‘‘کہ مثلہ نہ کرنا ، یعنی کسی دشمن کو یاتو قتل کر دینایا معاف کردینا اِسکے برعکس اِسکے جسمانی اعضاء کو تکلیف مت دینا۔اِس طرح رسول اللہﷺ نے کفار کے مُردوں کا بھی خیال رکھا اور اُن کی شکل بگاڑنے سے منع فرمادیا۔

عبد الرحمٰن مبارکپوری مذکورہ حدیث کی شرح کرتے ہوئے لکھتے ہیں:"وكره أهل العلم المثلة" أي حرموها فالمراد بالكراهة التحريم وقد عرفت في المقدمة أن السلف رحمهم الله يطلقون الكراهة ويريدون بها الحرمة‘‘.^[15] کہ اہلِ علم نے مثلہ کرنے کو مکروہ کہا ہے یعنی اُن کے نزدیک یہ مکروہِ تحریمی ہے جو حرام ہے اور میں نے مقدمہ میں دیکھا کہ اسلاف رحمہم اللہ مثلہ کرنے پر مکروہ کا اطلاق کرتے مگر اِس سے مُراد حرمت لیتے۔ تو معلوم ہوا کہ علماء و محدثین کے نزدیل مثلہ کرنا حرام ہے ۔ اور اِسکی حرمت نبی خاتم النبین ﷺ کے حکم اور عمل سے مستفاذ ہے۔

کفار کے بچوں خواتین اور بوڑھوں کو قتل کرنے سے منع کرنا

رسول اللہ ﷺ ہمیشہ بڑوں کو احترام دیتے اور چھوٹوں پر شفقت فرماتے ، جنگ پر جاتے ہوئے خاتم المرسلین ﷺ ہمیشہ اپنے اصحاب کو نصیحت فرماتے کہ کفار کے چھوٹے بچوں ، خواتین اور بوڑھوں کا خاص خیال رکھا جائے ، وہ چھوٹے بچے، خواتین اور بوڑھے کہ جو نہ جنگ کر سکیں اور نہ ہی ہتھیار اُٹھاکر میدان میں آئیں تو اُنہیں نہ قتل کرنا۔ چنانچہ امام مسلم اور امام ابو داود اپنی حدیث کی کُتب میں ایک طویل حدیث ذکرکرتے ہیں جس میں سے یہ بھی الفاظ ہیں((ولاَ تقتُلُوا وَلِيداً))^[16]ابو داو‘د کے الفاظ ((وَلَا تَقْتُلُوا شَيْخًا فَانِيًا وَلَا طِفْلًا وَلَا صَغِيرًا وَلَا امْرَأَةً))^[17]یعنی رسول اللہﷺ فرماتے:’’ چھوٹے بچے کو قتل نہ کرنا، شیخ ِ فانی(بوڑھے شخص ) کو قتل نہ کرنا، اور نہ ہی طفل(دودھ پیتے بچے) کو اور نہ چھوٹے بچے کواور نہ ہی کسی عورت کو۔

کیونکہ عموما ایسا ہی ہوتا ہے کہ ایسے بچے ، بوڑھے اور خواتین جنگ نہیں کرتیں، بلکہ یہ اپنے بڑوں کے یا اپنے سرداروں کے ماتحت آتے ہیں۔ بچے اِس لئے کہ جنگ کے مکلف نہیں ہوتے ، خواتین اور بوڑھے کمزور جسم کے مالک ہوتے ہیں۔ رسول اللہﷺ کو اگر معلوم ہوتا کہ کسی نے بچوں کو قتل کیا تو آپﷺ اِس پر غضب فرماتے چنانچہ حدیثِ نبوی میں ہے:

’’عَنِ الأَسْوَدِ بْنِ سَرِيْعٍ رضي الله عنه قَالَ: کُنَّا فِي غَزَاة فَأَصَبْنَا ظَفَرًا وَقَتَلْنَا مِنَ الْمُشْرِکِيْنَ حَتّٰی بَلَغَ بِهِمُ الْقَتْلُ إِلٰی أَنْ قَتَلُوْا الذُّرِّيَةَ فَبَلَغَ ذَالِکَ النَّبِيَّ صلی الله عليه وآله وسلم فَقَالَ: ((مَا بَالُ أَقْوَامٍ بَلَغَ بِهِمُ الْقَتْلُ إِلٰی أَنْ قَتَلُوْا الذَّرِيَةَ أَ لَا لَا تَقْتُلُنَّ ذُرِّيَةً أَ لَا لَا تَقْتُلَنَّ ذُرِّيَةً قِيْلَ: لِمَ يَا رَسُوْلَ اللهِ، أَلَيْسَ هُمْ أَوْلَادُ الْمُشْرِکِيْنَ؟ قَالَ: أَوَ لَيْسَ خِيَارُکُمْ أَوْلَادَ الْمُشْرِکِيْنَ))‘‘.

’حضرت اسود بن سریع رضی اللہ عنہ بیان کرتے ہیں کہ ہم ایک غزوہ میں شریک تھے (ہم لڑتے رہے یہاں تک) کہ ہمیں غلبہ حاصل ہوگیا اور ہم نے مشرکوں کو (خوب) قتل کیا حتی کہ نوبت یہاں تک پہنچ گئی کہ لوگوں نے (بعض) بچوں کو بھی قتل کر ڈالا۔ یہ بات حضور نبی اکرم صلی اللہ علیہ وآلہ وسلم تک پہنچی تو آپ صلی اللہ علیہ وآلہ وسلم نے فرمایا: ان لوگوں کو کیا ہوگیا ہے جن کے قتل کی نوبت یہاں تک پہنچ گئی کہ انہوں نے بچوں تک کو قتل کر ڈالا۔ خبردار! بچوں کو ہرگز ہرگز قتل نہ کرو، خبردار! بچوں کو ہرگز ہرگز قتل نہ کرو، عرض کیا گیا: یا رسول اللہ! کیوں؟ کیا وہ مشرکوں کے بچے نہیں؟ آپ صلی اللہ علیہ وآلہ وسلم نے فرمایا: کیا تم میں سے جو (آج) بہتر لوگ ہیں (کل) یہ بھی مشرکوں کے بچے نہیں تھے؟‘‘۔

ایک دوسری روایت میں ہے کہ ایک شخص نے عرض کیا :یارسول اللہﷺ! ’’إِنَّمَا هُمْ أَبْنَاءُ الْمُشْرِکِيْنَ، فَقَالَ: ((خِيَارُکُمْ أَبْنَاءُ الْمُشْرِکِيْنَ، أَ لَا، لَا تُقْتَلُ الذُّرِّيَةُ، کُلُّ نَسَمَة تُوْلَدُ عَلَی الْفِطْرَةِ، حَتّٰی يُعْرِبَ عَنْهَا لِسَانُهَا، فَأَبَوَاهَا يُهَوِّدَانِهَا وَيُنَصِّرَانِهَا))‘‘.

وہ مشرکین کے بچے ہیں۔ آپ صلی اللہ علیہ وآلہ وسلم نے فرمایا: تم میں سے بہترین لوگ بھی تو مشرکین کے بچے ہیں (یعنی اُن کے والدین مشرک تھے)۔ خبردار! بچوں کو جنگ کے دوران قتل نہ کیا جائے ہر جان فطرت پر پیدا ہوتی ہے یہاں تک کہ اُس کی زبان اُس کی فطرت کا اظہار نہ کردے، پھر اُس کے والدین اُسے یہودی یا نصرانی بناتے ہیں۔‘‘

اِن احادیث سے معلوم ہوا کہ رسول اللہﷺکفار ومشرکین کے بچوں کو قتل کرنے سے منع فرماتے ، اور اگر کوئی مزاحمت کرنے کی کوشش کرتا تو آپﷺ اُسے یہ فرماتے:’’ کیا تم میں سے بہترین جو لوگ ہیں وہ مشرکین کے بچے نہ تھے جیسا کہ حضرت عکرمہ رضی اللہ تعالیٰ عنہ اور دیگر اصحابِ رسول کہ اُن کے والد یا والدین مشرک تھے۔ تو اِس لئے رسول اللہﷺ اِس سے سختی سے منع فرمادیتے۔ اور فرماتے :’’بچوں کا کوئی گناہ یا قصور نہیں ہے، ہر بچہ تو فطرت پر پیدا ہوتا ہے یہ اُنکے والدین کا جرم ہے کہ اُسے وہ یہودی یا عیسائی بنادیں۔

حتیٰ کہ ایک مرتبہ ایک مشرک عورت کو جب قتل کردیا گیا تو رسول اللہﷺ نے سختی سے منع فرمایا چنانچہ حدیث میں ہے:

’’ عَنْ رَبَاحِ بْنِ رَبِيْعٍ رضي الله عنه قَالَ: کُنَّا مَعَ رَسُوْلِ اللهِ صلی الله عليه وآله وسلم فِي غَزْوَة، فَرَأَی النَّاسَ مُجْتَمِعِيْنَ عَلٰی شَيئٍ، فَبَعَثَ رَجُـلًا فَقَالَ: انْظُرْ عَـلَامَ اجْتَمَعَ هٰـوُلَاءِ؟ فَجَاءَ فَقَالَ: عَلَی امْرَأَة قَتِيْلٍ، فَقَالَ: ((مَا کَانَتْ هٰذِه لِتُقَاتِلَ، قَالَ: وَعَلَی الْمُقَدِّمَةِ خَالِدُ بْنُ الْوَلِيْدِ، فَبَعَثَ رَجُـلًا فَقَالَ: قُلْ لِخَالِدٍ: لَا يَقْتُلَنَّ امْرَأَةً وَلَا عَسِيْفًا)). وفي رواية: ((لَا تَقْتُلَنَّ ذُرِّيَةً وَلَا عَسِيْفًا))^[18].

’’حضرت رباح بن ربیع رضی اللہ عنہ بیان کرتے ہیں کہ ایک غزوہ میں ہم حضور نبی اکرم صلی اللہ علیہ وآلہ وسلم کے ساتھ تھے کہ آپ صلی اللہ علیہ وآلہ وسلم نے دیکھا بہت سے لوگ کسی چیز کے پاس جمع ہیں۔ آپ صلی اللہ علیہ وآلہ وسلم نے ایک آدمی کو یہ دیکھنے کے لئے بھیجا کہ لوگ کس چیز کے پاس جمع ہوئے ہیں۔ اُس نے آکر بتایا: ’’ایک مقتول عورت کے پاس‘‘تو فرمایا:’’ یہ تو جنگ نہیں کرتی تھی‘‘۔ حضرت رباح رضی اللہ عنہ بیان کرتے ہیں کہ اگلے دستے کے کمانڈر حضرت خالد بن ولید رضی اللہ عنہ تھے لہٰذا آپ صلی اللہ علیہ وآلہ وسلم نے ایک آدمی کو بھیجا اور فرمایا:’’ خالد سے کہنا:’’ (مشرکین کی) عورتوں اور خدمت کرنے والوں کو ہرگز ہرگز قتل نہ کرو‘‘ ایک روایت میں ہے: ’’بچوں اور خدمت گاروں کو ہرگز ہرگز قتل نہ کرو‘‘۔

کس خوبصورت انداز میں رسول اللہﷺ نے حکمت واضح فرمادی کہ یہ عورت قتال تو نہیں کرتی تھی، پھر کیوں اِسے قتل کر دیا گیا؟ اورجب حضرت خالد بن ولید رضی اللہ تعالیٰ عنہ کی کمانڈ میں ایک لشکر جانے لگا تو رسول اللہﷺ نے اُنہیں خوب تاکید فرمائی کہ کسی مشرکہ عورت کو قتل نہ کرنا اور نہ ہی غلاموں اور بچوں کو۔ اِس سے رسول اللہﷺ کا حُسنِ سلوک واضح ہوگیا کہ آپﷺ بچوں، خواتین اور غلاموں کوقتل کرنے کے خلاف تھے، کیونکہ یہ لاچار ہوتے ہیں جبکہ تلوار ظالم کے خلاف بلندکی جاتی ہے۔

حالتِ جنگ میں امن کا اعلان کرنا

جب بھی کوئی طاقت والی قوم کسی دوسری قوم پر چڑھائی کرتی ہے تو وہ اُس دن کسی کو معاف نہیں کرتی کیونکہ اُس دن اُن کے پاس طاقت ہوتی ہے، وہ بچوں، خواتین، بوڑھے حتیٰ کہ درخت اور جانوروں کو بھی جلا دیتے ہیں، ہمارے سامنے ہلاکو خان اور چنگیز خان کی مثالیں موجود ہیں کہ جنہوں نے بغداد میں خون کی وادیاں بہا دیں اور بغیر کسی وجہ سے مسلمانوں کا خون بہادیا۔ اِسکے برعکس رسول اللہ ﷺ جب اپنی مکمل طاقت کے ساتھ مکۃ المکرمہ میں داخل ہوتے ہیں تو اُس وقت رسول اللہﷺ نے سوائے چند ایک گستاخ کے سب کو معاف فرمادیا۔

چنانچہ اِس ضمن میں امام مسلم اپنی صحیح میں لکھتے ہیں:

’’  عَنْ أَبِي هُرَيْرَةَ رضي الله عنه قَالَ: قَالَ رَسُوْلُ اللهِ صلی الله عليه وآله وسلم (في يوم فتح مکة): مَنْ دَخَلَ دَارَ أَبِي سُفْيَانَ فَهُوَ أمِنٌ، وَمَنْ أَلْقَی السِّلَاحَ فَهُوَ أمِنٌ، وَمَنْ أَغْلَقَ بَابَه فَهُوَ أمِنٌ‘‘^[19].

’’حضرت ابو ہریرہ رضی اللہ عنہ بیان کرتے ہیں کہ فتح مکہ کے دن حضور نبی اکرم صلی اللہ علیہ وآلہ وسلم نے فرمایا:’’ جو شخص ابو سفیان کے گھر میں داخل ہو جائے گا اُسے امان حاصل ہے، جو شخص ہتھیار پھینک دے اُسے امان حاصل ہے، جو شخص اپنے گھر کے دروازے بند کر لے اُسے امان حاصل ہے‘‘۔

یہ رسول اللہﷺ کا ابو سفیان کے دل کو سکون دینے اور اُن کی عزت کو مزید بڑھانے کے لئے ایسا اقدام تھا کہ جو بھی ابو سفیان کے گھر داخل ہو جائے گا وہ امن پا جائے گا۔اور یہ رسول اللہﷺ کا خاص منہج تھا کہ جو آپ ﷺ کو زیادہ تکلیف دیتا تو آپ ﷺ اُسکے ساتھ حُسنِ سلوک کا بھی زیادہ اہتمام فرماتے، اور پھر رسول اللہﷺ نے فرمایا:’’ جو شخص اپنا اسلحہ پھینک دے گا اور اپنا دروازہ بند کر لے گا وہ بھی امن پا جائے گا اور ایسا ہی ہوا جس جس نے مزاحمت کی جیسا کہ عکرمہ کی قیامت میں ایک لشکر نے حضرت خالد بن ولید رضی اللہ تعالیٰ عنہ سے مزاحمت کی تو چندکفار واصلِ جہنم ہوگئےاور جو جو مزاحمت سے بچ گیا وہ نجات پاگیا۔ یہ رسول اللہﷺ کا حُسنِ اخلاق ہی تو تھا کہ ابو سفیان کلمہ پڑھ کر مسلمان ہوگئے اور حضرت عکرمہ بھی ، اور کئی کفار اسلام میں داخل ہوگئے۔

اور یہ رسول اللہﷺ کا اعلیٰ اخلاقی نمونہ ہی تو تھا کہ آپﷺ نے عام امن کا اعلان کردیا اور ہر ایک کو معاف فرمادیا، جبکہ رسول اللہﷺ کے جانی دشمن، آپ ﷺ کو مکہ سے نکال دینے والے دشمن حتیٰ کہ کئی ایک غزوات میں رسول اللہﷺ کے مد مقابل اور کئی صحابہ وصحابیات کے قاتل لوگ وہاں موجود تھے مگر رحمۃ اللعالمین نبی نے سب کو معاف فرمادیا۔

کفار کے املاک کو نقصان پہنچانے سے منع فرمانا

اسلام میں جہاں پر اُن لوگوں کو قتل کرنا جائز نہیں کہ جو جنگ نہ کریں تو وہی پر کفار کے املاک یعنی اُن کے درخت اور اُن کے جانور اور اُن کی عمارات کو بھی نقصان پہنچانا جائز نہیں ہے۔ چنانچہ رسول اللہﷺ نے جب غزوہ ِ موتہ کے لئے تیس ہزار کا لشکرِ جرار تیار کروایا تو اُن کو اپنی وصیت فرماتے ہوئے چند چیزوں سے منع فرمایا کہ بچوں کو قتل نہ کرنا، درختوں کو مٹ کاٹنا، اُن کی عمارات کو منہدم مت کرنا چنانچہ روایات میں آتا ہے کہ رسول اللہ ﷺ نے فرمایا:

((اغزوا باسمِ اللهِ فقاتلوا عدوَ اللهِ وعدوَكم بالشامِ، وستجدون فيها رجالاً في الصوامعِ معتزلينَ فلا تتعرضوا لهم، ولا تقتلوا امرأةً ولا صغيراً ولا بصيراً فانياً، ولا تقطعوا شجراً ولا تهدموا بناءً))^[20]

کہ اللہ کے نام سے اللہ کے دشمنوں سے شام میں لڑو،عنقریب تمہیں وہاں پر چرچ میں کچھ لوگ ملیں گے جو جنگ سے اعراض کئے ہوئے ہوں گے تم اُن کے درپے مت ہونا، کسی عورت، چھوٹے بچے اور بوڑھے کو قتل مت کرنا، اور نہ ہی کسی درخت کو کاٹنا اور نہ ہی کوئی عمارت منہدم کرنا۔

کیا ہی خوبصورت وصیت فرمائی رسول اللہﷺ نے ، اور کتنی عظیم جوامع الکلم ارشاد فرمائے چودہ سو سال بعد بھی جنرل اسمبلی نے یہی جنگ کے قوانین رکھیں ہیں کہ جنگ میں بچوں، بوڑھے ، خواتین، علماء وصوفیاء کو قتل نہ کیا جائے اور نہ ہی درختوں کو کاٹا جائے اور نہ ہی کسی عمارت کو تباہ کیا جائے۔ املاک کی حفاظت کرنا رسول اللہﷺ کا اہم فریضہ ہوتا تھا؛ کیونکہ جس جگہ کو جنگ سے جیتا جاتا وہاں کی عمارات اور درخت بھی مسلمانوں کے ہی حصہ میں آتے ۔ اِس لئے رسول اللہﷺ کفار کے املاک کو نقصان پہنچانے سے منع کرتے۔ حتیٰ کہ اُن کے علماء کو بھی منع کرتے کیونکہ اللہ جب اُنہیں حقیقت سے آشنا کرتا تو وہ بھی اسلام قبول کر لیتے جیسا کہ حضرت عبد اللہ بن سلام رضی اللہ تعالیٰ عنہ تھے کہ وہ یہود کے ایک بہت بڑے عالم تھے مگر اسلام کی حقانیت کو جان گئے اور اسلام میں آگئے۔

رسول اللہ ﷺ ہر حال میں کفار و مشرکین کے ساتھ بھی حُسنِ سلوک کو روا رکھتے ، کبھی کسی غیر مسلم پر ظلم نہ کرتے اور نہ ہی زیادتی کرتے اور نہ ہی کسی غیر مسلم کا مال ناحق طور پر استعمال کرتے ۔ بلکہ جس طرح آپ ﷺ مسلمین کے لئے رحمت تھے ایسے ہی کفار کے لئے بھی آپﷺ رحمت تھے۔ اِسی لئے حضرت دعثور جب بنو ثعلبہ کے سپہ سالارتھے اور رسول اللہﷺ کے سامنے تلوار بے نیام لے کر آئے اورکہا کہ یارسول اللہ! اب آپ کو کون مجھ سے بچائے گا تو آپ ﷺ نے فرمایا:’’اللہ‘‘ تو اُن کے ہاتھ سے تلوار گر گئی تورسول اللہﷺ نے تلوار کو اُٹھاتے ہوئے فرمایا:’’دعثور ! اب تجھے مجھ سے کون بچائے گا؟ تو خیر وہی دعثور جو ایک وقت میں کفار کی فوج کا سپہ سالار تھا تو رسول اللہﷺ کے اعلیٰ اخلاق کو دیکھ کر کلمہ پڑھ کر مسلمان ہوگئے۔

رسول اللہﷺ کفار کے ظلم کے خلاف اُن کے لئے دعائے ہلاکت نہ فرماتے ۔ حتیٰ کہ آپ ﷺ کو لہوولہان کر دیا جاتا مگر آپ ﷺ اُن کے لئے ہدایت کی ہی دعا فرماتے اور صحابہِ کرام رضوان اللہ تعالیٰ علیھم اجمعین کو فرماتے :’’ مجھے اِن کفار کی نسل سے فرماں بردار نظر آرہے ہیں‘‘۔ طائف والوں اور مکہ والوں نے کیا کیا ظلم نہ کئے تھے رسول اللہﷺ پر مگرخاتم النبین ﷺ نے فتحِ مکہ کے موقع پر اُن سب کو معاف فرمادیا۔ اور نہ صرف معاف فرمایا بلکہ امن بھی عطا فرمایا۔ اور رسول اللہﷺ کفار کو لعن طعن کرنے سے بچتے اور صحابہ کو بھی حکم دیتے ۔اور فرماتے :’’ مجھے تو اللہ نے رحمت بنا کر بھیجا ہے نہ کہ لعنت کرنے والا بنا کر۔

رسول اللہﷺ کفار کے خلاف تلوار کبھی اپنی ذات کے لئے نہ نکالتے بلکہ آپ کا مقصد احیائے کلمۃ اللہ ہوتا اور احیائے دینِ متین ہوتا، حالتِ جنگ میں اگر کسی غیر مسلم کو پانی کی ضرورت ہوتی تو آپ ﷺ اُنہیں پانی عطا فرماتے جیسا کہ غزوہِ بدر میں ہوا کہ دشمن کے لوگ پانی لینے آتے تو رسول اللہﷺا ُنہیں پانی عطا فرما دیتے ۔ جنگ کے دوران کفار کی اشکال کو بگاڑنے سے منع کرتے اور کفار کے بچوں، خواتین اور بوڑھو ں کو بھی قتل کرنے سے روکتے ۔رسول اللہ ﷺ سختی سے منع فرماتے کہ کفار کے املاک، اُنکی عبادت گاہوں ، اُنکی کھیتی باڑی اور جانوروں کو بھی حالتِ جنگ میں نقصان نہ پہنچایا جائے۔ حتیٰ کہ کفار کے بچوں کے قتل کرنے سے متعلق کسی صحابی نے عرض کیا:’’حضور! یہ بھی تو کفار کے بچے ہیں اِنہیں بھی قتل کردینا چاہئے ‘‘ تو رسول اللہﷺ نے فرمایا:’’تم بھی تو کفار کی ہی اُولاد تھے‘‘۔

’’ غزواتِ نبویہ ﷺ میں قیدیوں کے ساتھ اخلاقِ حسنہ کے مظاہر‘‘

زمانہِ جاہلیت میں قیدیوں کے ساتھ نازیبا سلوک کیا جاتا، اُن پر طرح طرح کے عجیب و غریب قسم کے مظالم ڈھائے جاتے ، اُنہیں معاشرہ کا سب سے کمزورطبقہ سمجھا جاتا تھا ۔ غلاموں کے چہروں پر مارا جاتا، اُن کے لئے جینے کے لئے کچھ نہ ہوتا بس وہ مرنے کے لئے ہی پیدا ہوتے یہ تصور عام تھا۔ اتنے میں رحمتِ دو عالم حضرت محمد ﷺ کا ظہور ہوا تو جہاں پر آپ نےآزاد والدین، اولاد، رشتہ دار، بیوی اور بچوں کو حقوق عطا فرمائے، وہاں پر آپ ﷺ نے اسیروں اور قیدیوں کو بھی حقوق عطا فرمائے۔ آپ دیکھ لیں آج کے دور میں کس طرح غیر مسلمین مسلمانوں کے قیدیوں کے ساتھ بُرا سلوک کر رہے ہیں، کشمیر، برمہ، انڈیا، فلسطین، شام اور عراق کے قیدیوں کی بے شمار مثالیں موجود ہیں۔ کہیں تو مسلمانوں کی نسل کشی کی جا رہی ہے اور کہیں اُن کی خواتین کے ساتھ ظلم وزیادتی، کہیں مسلمان بچوں کو تعلیم سے دور رکھا جا رہا ہے تو کہیں علاج سے ۔ کیا کچھ نہیں ہو رہا ہے مسلم اقوام کے ساتھ مگر دوسری طرف کیا رسول اللہ ﷺ آج سے چودہ برس قبل قیدیوں پر ظلم و ستم کرنے پر قادر نہ تھے؟ کیا رسول اللہﷺ کفار کی نسل کشی کرنے پر قادر نہ تھے؟یہ سب ممکن تھا اور علاج بھی مگر آپ ﷺ نے ایسا کرنے سے صحابہ کو بھی منع کیا اور ایک بھی مثال ایسی نہیں ملتی کہ جناب رسول اللہﷺ نے قیدیوں کے ساتھ ظلم و ستم کیا ہو، اِسکی اجازت دی ہویا اِسے سراہا ہو۔ ذیل میں چند امثلہ ملاحظہ کی جا سکتی ہیں۔ قیدیوں کے ساتھ حُسنِ سلوک کا حکم