مولاناؒ کا ایک نہایت ہی مفید کام تفسیر صدیقی ہے۔ جس کی سخت ضرورت اس اعتبار سے تھی کہ آپ کے دور میں مختلف مکاتب خیال مختلف گمراہیاں پھیلا رہے تھے۔ بعض شریعتِ اسلامیہ کی ظاہریت کے دلدادہ تھے اور باطن کی طرف ایک انچ بھی آگے بڑھنا نہیں چاہتے تھے۔ بعض وہ تھے جو صوفیا کے بھیس میں آئے لیکن ان کے افکار و تعلیمات نہ اسلامی بصیرت سے منور تھے اور نہ حقیقی اسلامی روح سے معمور ۔ بعض حدیث کے منکر تھے اور صرف قرآن پر عمل کی دعوت دیتے، بعض وہ تھے جو قرآنی آیات کے سرچشمہ سے سائنس کے پیالہ میں اللہ کے بندوں کو آبِ حیات پلانا چاہتے تھے اور جو قرآن کو تھیوری اور سارے عالم اور اس کے مظاہر کو پریکٹیکل قرآ ن کہہ کر دوقرآن کا دعویٰ کرتے تھے۔ تلاوت قرآن ، ذکرو شغل، تسبیح و تحمید، درود و سلام کو کارعبث ، صوفیانہ ریاضتوں کو وقت کی تباہی، صوفیاء فقراء کو کم عقل اور پیری مریدی کو پیٹ پالنے کا ڈھونگ سمجھتے تھے اور علماء ،صوفیا اور بزرگان دین کی تحقیر میں کوئی کسر نہ چھوڑتے تھے۔ تقلیدِ امام کو تقلید شخصی کا الزام دیتے اور ایک ہی جامع فقہی مذہب کا شاخسانہ چھوڑے ہوئے تھے۔ ان کے علاوہ تجدید ایمان کا بہانہ تراش کر مسلمانوں کو کلمہ پڑھوانے والوں میں قادیانی ، امامیہ اور تفضیلی پیش کرتے تھے۔ مولانا نے اپنی تفسیر کا مقدمہ لکھا ہے جس میں تمہیدی کلمات کے علاوہ اعجازقرآن ، مخارجِ حروف،صفات حروف،قرآن کے متن پر علامات تجوید،قرآن کی روایت و حفاظت، اُصول تاویل،مسئلہ عدم نسخِ قرآن،قرآن وحدیث کا باہمی تعلق،اختلافات ائمہ،تصوف،لغات قرآنی،شان نزول،ربطِ آیات، قصص قرآن،آیات کی تکرار کا فائدہ، قرآنی قَسمیں اور خصوصیات تفسیر جیسے مضامین درج کیے ہیں۔¹⁰

مولاناؒ کی یہ مشہور تفسیر ہے جس کی اشاعت ابتداءً بر س ہا برس تک قسط وار ’’ درس القرآن ‘‘ نامی جریدہ میں ہوا کرتی تھی۔ پاکستان میں مولاناؒ کے شاگردوں اور مریدوں نے اسکی طباعت اور اشاعت کا انتظام کیا۔ اس کی کاپیاں یا نسخہ جات حیدرآباد اور ہندوستان کے دوسرے تمام شہروں میں مقبول عام ہوئیں۔ تفسیر صدیقی کُل چھ(۶) جلدوں پر مشتمل ہے۔پاروں کے حساب سے جلدوں کی تقسیم کی گئی ہے۔ ہر جلد پانچ پاروں پر مشتمل ہے۔ ہر جلد کو الگ الگ صفحہ نمبر نہیں لگائے گئے بلکہ تسلسل کے ساتھ صفحہ نمبر جلد ایک سے جلد ششم تک لگائے گئے ہیں ۔ کل صفحات ۳۸۰۹ ہیں۔طبع اول ۱۹۵۶ ؁ء میں ہوئی ۔ تفصیل درج ذیل ہے۔ نظر ثانی کے بعد دوبارہ اشاعت ۱۹۹۵ ؁ء میں ہوئی۔¹¹

ناشر: ادارہ اشاعت تفسیر صدیقی(رجسٹرڈ) 1/22B ،بلاک نمبر11 گلشن اقبال کراچی، پاکستان۔  مقام اشاعت: 75/A لطیف آباد نمبر10 حیدر آباد سندھ پاکستان۔ 
مطبع : نیوگرین پرنٹرز، نزد پی آئی اے آفس صدر حیدرآباد
5 تفسیر صدیقی کی خصوصیات

تفسیر میں مولاناؒ نے بہت اہم مسائل کو حل کرنے کی کوشش کی ہے۔لیکن موجودہ صورتحال کے اعتبار سے مسائل کے حل کے لیے لکھتے ہیں کہ “صاحبو ! ایک میرا خیال ہے، وہ یہ کہ زمانہ گر دش کر رہا ہے۔ مسلمانوں پر کبھی مکی حالت ہے اور کبھی مدنی۔ جیسی حالت ویسا حکم۔ اس زمانے میں ہم مکی حالت میں ہیں، اس وقتفَاقْتُلُواْ الْمُشْرِكِينَ حَيْثُ وَجَدتُّمُوهُمْکا حکم نہیں دیا جا سکتا، بلکہولا تُلْقُوا بِأَيْدِيكُمْ إِلَى التَّهْلُكَةِکا حکم دینا چاہیے''۔ ¹²

تفسیر میں مولاناؒ نے کسی کسی سورۃ کا شان نزول بہت ہی مختصر لکھا ہے ۔ اس حوالے سے بیان کرتے ہیں کہ:”فقیر نے تفسیر صدیقی میں بہت کم جگہ اسباب نزول بیان کیے ہیں۔میں قرآن شریف کو ''مبین '' سمجھتا ہوں ۔ اسکا سمجھنا قصہ کہانیوں پر موقوف نہیں۔ قرآن شریف کوئی تاریخی کتاب نہیں ہے۔ کوئی واقعہ بیان نہیں کیا جاتامگراُسکی غرض عبرت اور نصیحت اور بری باتوں سے روکنا قرآن شریف کا کام ہے۔ امربالمعروف اور نہی عن المنکر۔ لوگ اِدھر اُدھر کے قصوں سے تفسیر کو کئی کئی جلدوں میں کر دیتے ہیں''۔ ¹³

تفسیر میں مولاناؒ نے ربط آیات کا بہت لحاظ رکھا ہے۔ مولاناؒ لکھتے ہیں کہ” میری بڑی کوشش ربط آیات ہے۔ ایک رکوع کو دوسرے رکوع کے ساتھ مرتبط کرنا، قصوں کو قصوں سے ملانا۔ اصل میں قصے تو ہیں ہی نہیں، نتیجہ خیز واقعات ہیں۔اس واسطے ربط آیات کی وجہ بعض بعض جگہ حذف ہے کچھ مقدر ہے۔عربی زبان کے لحاظ سے ان میں ربط پیدا کرنا ضروری ہے۔ ایسا حذف قرآنی اسلوب کے لوازم سے ہے۔ عرب لوگ جہاں حذف کیا کرتے تھے اُسی طرح قرآن میں بھی کیا گیا ہے۔ اس حذف وتقدیرکا مزہ اُسی کو ملتا ہے جو عربوں کے طرز بیان اور اسٹائل سے واقف ہو۔ جہاں حذف کیا گیا ہے اگر محذوف بیان کردیا جائے تو وہ جملہ بالکل بھدا ہو جائے گا، اُس کا بانکپن اور حسن باقی نہیں رہے گا۔¹⁴

قرآن میں آیات کی تکرارہے۔اسکی کئی حکمتیں ہیں۔ مولاناعبدالقدیر صدیقیؒ آیات کی تکرار کے فوائد لکھتے ہیں کہ: ''بعض بعض جگہ ایک ہی آیت کو متعدد جگہ بار بار دہرایا گیاہے۔اس کا لطف تو اُن کو ملتاہے جو عربی کا صحیح مذاق رکھتے ہیں۔ مثلاََفَبِأَيِّ آلاء رَبِّكُمَا تُكَذِّبَانِایک جاہل قرآن کا خلاصہ کرنے بیٹھا، اور اُس نے مکرر آیات اور قصوں کو نکال دیا۔ اسکا نتیجہ کیا ہوا۔۔۔ نہ قرآ ن کا سٹائل باقی رہا اور نہ اُسکا حسن۔ قرآن کی حالت یہ ہے کہ ایک لفظ کی جگہ اسکا مترادف رکھیں تو درست نہیں۔قرآن کی عبارت میں ایک ایک لفظ اپنی جگہ ایسا جما ہوا ہے جیسا انگشتری میں نگینہ۔ جہاں فعل،فاعل ہیں وہ مبتداء خبر نہیں بنائے جا سکتے۔ ایک ہی قصہ کو متعدد جگہ بیان کرنا اور ہر جگہ ایک نیا ہی لطف پیدا کرنا یہ اعلیٰ درجہ کے فصیح و بلیغ کا کا م ہے''۔¹⁵

“قرآن میں جابجا قسمیں ہیں۔ کوئی قسم قرآن میں ایسی نہیں جس سے فائدہ خاص حاصل نہ ہو۔ بعض مفسرین نے ''وَالتِّينِ وَالزَّيْتُونِ ۔ وَطُورِ سِينِينَ ،وَهَذَا الْبَلَدِ الأَمِينِ'' کی تفسیر میں انجیر کے خواص اور فوائد بیان کرنا شروع کر دیے ہیں۔زیتون کے خواص اور کوہ طور کی تعریف کرنے لگے۔ کیا یہ طب کی کتاب ہے کہ دواؤں کے خواص اور میووں کے خواص بیان کئے گئے ہیں؟ باغ تین دمشق میں ہے۔ جبل زیتون بیت المقدس میں ہے۔ کوہ طور موسی علیہ السلام کے لیے تجلی گاہ کا نام ہے۔ اصل یہ ہے کہ “واؤ اور باء‘‘ کے معنی “اور،ساتھ‘‘کے ہیں۔ اللہ تعالیٰ شہادت پیش کر رہا ہے۔ قسم کیا ہے؟ شہادت ہے۔اللہ تعالیٰ اس سرزمین کو شہادت کے طور پر پیش کر تا ہے ۔¹⁶

سورۃ الحجر کی آیت نمبر ۷۲کے ضمن میں لکھتے ہیں کہ” خدا تعالیٰ نے اپنے پیغمبر ﷺ کی عمر کی قسم کھاتا ہے، اُن کی سوانح حیات کو بطور گواہ پیش کرتا ہے کہ پیغمبر کے نہ ماننے والے مدہوش ہیں،بے عقل ہیں، غفلت میں گرفتا ر ہیں۔ صراط مستقیم تو رسول اللہ ﷺ کی تعلیم ہے جو اُنہیں نہیں مانتے ،وہ عاقل نہیں غافل ہیں''۔¹⁷

سورۃ قیامۃمیں بھی لا أُقْسِمُ بِيَوْمِ الْقِيَامَةِ O وَلا أُقْسِمُ بِالنَّفْسِ اللَّوَّامَةِO کے ضمن میں بھی مولانا قسم سے مراد گواہی اور شہادت لیتے ہیں چنانچہ یوں بیان کرتے ہیں “ لا نہیں جی۔ تم جیساخیال کرتے ہو ویسا نہیں ہے۔ أُقْسِمُ بِيَوْمِ الْقِيَامَةِ ،میں روز قیامت کی قسم کھا کر کہتا ہوں۔ روز قیامت گواہی دے گا۔ ولا، اور نہیں جی ، أُقْسِمُ بِالنَّفْسِ اللَّوَّامَةِملامت کرنے والے نفس کی قسم کھا کر کہتا ہوں۔ اسکو شہادت میں پیش کرتا ہوں¹⁸۔

سورۃ بروج کی پہلی آیت والسماء ذات البروج کی تشریح میں بیان کرتے ہیں کہ “ قسم ہے آسمان کی ، میں آسمان کو شہادت میں پیش کرتا ہوں، آسمان اپنی زبان حال سے شہادت دے گا۔¹⁹

سورۃ الفجر کی پہلی آیت والفجرکا ترجمہ یوں کرتے ہیں” میں فجر کو شہادت کے طور پر پیش کرتا ہوں فجر کی قسم کھاتا ہوں''۔ ²⁰

مولاناؒ حروف مقطعات کے معنی کرتے ہیں۔ یہ آیات متشابہات میں سے ہے۔ مقطعات قرآنی ہیں۔ اللہ اعلم بمرادہ۔ یہ بھی لکھتے ہیں کہ اس کے معنی اور مقاصد اللہ کے پیغمبر اور ان لوگوں کو معلوم ہیں جن کو خدائے تعالیٰ نے اس علم سے سرفراز فرمایا ہے۔²¹

بعض ادیبوں نے یہ لکھا ہے کہ تمام حروف ملائے جائیں تو اقسام ، انواع اور صفات حروف کے نصف نصف حروف ہیں۔ جیسے قلقلۃ اور ھمس وغیرہ۔ بعضوں نے یہ لکھا ہے کہ ان حروف کے ذریعے سے تحدی اور دعویٰ کیا جاتا ہے کہ یہی اٹھائیس حروف ہیں جن کو تم رات دن بولتے ہو اور اپنے ادیب و فصیح ہونے کا دعویٰ کرتے ہو۔ بھلا ان ہی حروف سے بنائے ہوئے قرآن کا جواب تو لکھو۔ تم کبھی نہیں لکھو گے، نہ لکھ سکو گے۔ یہ قرآن ہے اسکے معنی بھی اعجاز ہیں اور عبارت بھی اعجاز ہے۔²²

مولاناؒ بعض اوقات کسی کی تاویل سے فائدہ حاصل کرتے ہیں۔یٰسٓ کے حوالے سے مولانا لکھتے ہیں کہ “ اسکے کوئی خاص معنیٰ تو بتائے نہیں گئے۔ بعض لوگ کہتے ہیں کہ س سید کا ہے۔ پس معنی یہ ہوئے یا سید، اے سید ! اے سردار۔ یہاں مولانا ؒ اپنی طرف سے کوئی بات نہیں کہتے۔بعض اوقات خود مولاناؒ بھی تاویل سے کام لیتے ہیں۔ مقطعات قرآنی میں سے ''ص'' کے ضمن میں لکھتے ہیں کہ”اسکے معنی تو اللہ ہی کو معلوم ہیں۔ ممکن ہے کہ صاد سے مراد صاحب قرآن ہو۔ اسی طرح سورۃ الزخرف کے ''حٰمٓ'' کے ضمن میں لکھتے ہیں کہ” اسکے معنی تو اللہ ہی کو معلوم ہیں مگر عاشقان محمدی اسکو دیکھتے ہیں اور گیسوئے محمد ﷺ سمجھتے ہیں''۔²³

سورۃ جاثیہ کے ''حٰمٓ'' کے متعلق لکھتے ہیں کہ ''اللہ اعلم بمرادہ''۔ بعض کے پاس اس سے حبیبی محمدﷺ مراد ہے''۔²⁴

آیات متشابہات کے ضمن میں مولاناؒ کا نظریہ ہے کہ لفظی معنیٰ کی بجائے معنی ٰ مقصود لیا جائے گا۔ آیات مشاکلات و متشابہات سے نتیجہ مراد ہوتا ہے نہ کہ لفظی مطلب۔ سورۃ آل عمران کی آیت نمبر ۷وَمَا يَعْلَمُ تَأْوِيلَهُ إِلاَّ اللَّهُ وَالرَّاسِخُونَ فِي الْعِلْمِ کا معنی یوں کرتے ہیں “ اسکے

معنی مرادو مقصود اللہ کےسوا کوئی نہیں جانتا(اللہ جانتا ہے) اور علم میں ثابت قد م لوگ(وہ)کہتے ہیں ہم کو اس کا یقین ہے۔‘‘ 

وَمَكَرُواْ وَمَكَرَ اللَّهُ (آل عمران:54)کے معنی اس طرح ہوں گے “ ان منافقین نے مکر کیااور اللہ نے انکے اس مکر کی سزادی۔‘‘ دیکھو ! ہم کہتے ہیں کہ ''ندی بہہ رہی ہے'' اور اس سے مراد لے رہے ہیں کیونکہ ندی میں کا پانی بہہ رہا ہے۔ لہٰذا متشابہات سے لفظی مطلب نہیں بلکہ مراد کو سمجھا جائے گا۔²⁵

مولا نا عبد القدیر صدیقی ؒ کا مؤقف یہ ہے کہ قرآن کی کوئی آیت بھی منسوخ نہیں ۔ لہٰذا مولانا کی مسئلہ عدم نسخ قرآن کے متعلق توضیح درج ذیل ہیں۔

“قرآن شریف کی آیتوں اور احکام کے منسوخ ہونے میں اختلاف ہے ۔ قرآن شریف کے تمام ادیان اور ملل اور رجال اقوام کے رسوم و عادات واحکام کے ناسخ ہونے میں ،ان میں تغیر پیدا کرنے میں نہ ہم کو نہ کسی اور کو کوئی اختلاف ہے۔ ان مفسرین کے اختلافات کا نتیجہ یہ ہوا کہ بعض کے پاس آیات احکام میں سے آدھے ناسخ و منسوخ ہیں۔ چنانچہ اس موضوع پر بڑی بڑی کتابیں لکھی گئی ہیں۔ ابن العربی نے اس تعداد کو گھٹایا ۔ حضرت امام جلال الدین سیوطی نے منسوخ آیتوں کی تعداد ۲۱تک مانی۔ حضرت شیخ احمد بن عبدالرحیم شاہ ولی اللہ نے صرف ۴۔۵تک مانی۔ میرے خیال میں قرآ ن کا کوئی حکم کوئی آیت منسوخ نہیں ۔ شاہ صاحب نے ان ۲۱آیتوں کے نسخ کے جو ابات دیئے ہیں ان کی تفصیلی شرح میں نے ایک مستقل رسالہ میں کی ہے ۔ اس موقع پر صرف غلط فہمی کے اسباب مجمل طورپر بیان کروں گا اور ان پانچ آیتوں کو بھی نسخ کے جھگڑے سے نکال لوں گا جن کو شاہ صاحب بھی منسوخ ماننے پر مجبور ہوئے تھے۔ اس طرح ان کے علمی خاندان کا ایک شخص ان کے مقصد کو پایہ تکمیل تک پہنچا دے گا۔ وللٰہ الحمد۔‘‘²⁶

7۔ کلامی مباحث اور تفسیر صدیقی:

کلامی مباحث کے حوالے سے مولاناؒ اپنی تفسیر میں مادہ پرستوں کا تو نام لے کر تبصرہ کرتے ہیں لیکن ان کے علاوہ کسی فرقہ، مذہب، مسلک وغیرہ کا نام نہیں لیتے ۔ چنانچہ بغیر نام لیے کچھ اعتراضات کا جواب دیتے ہیں۔وہ اعتراضات غیر مسلم مفکرین(مستشرقین) کے ہیں۔ ایسے غیر مسلم مفکرین جو مشرقی علوم (اسلام) پر دسترس رکھتے ہیں ان کو ''مستشرقین'' کہا جاتا ہے۔ تفسیرصدیقی ایسے دور (بیسویں صدی کے نصف اول) میں لکھی گئی جب غیر مسلموں کی حکمرانی تھی اور انگریزی مشنری اسلام کے خلاف کام کر رہی تھی۔ انہوں نے حیلوں بہانوں سے قرآن، اسلام اور پیغمبر اسلام پر مختلف انداز میں اعتراضات کیے۔ہر صاحب فکر اسلام کے خطرے سے نمٹنے کے لئے کوئی نہ کوئی اعتراض کر دیتا۔ سب کا مطمح نظر اسلام کو کسی نہ کسی طرح نیچا دکھانا تھا۔صلیبی جنگوں کے بعد اسلام کونیچا دکھانے کے لیے نظریاتی انداز اپنایا گیا ۔ جن لوگوں نے اس مقصد کے لیے کام کیا وہ مستشرقین کہلائے۔

مولانا عبد القدیر صدیقی حسرتؔ نے اپنی تفسیر میں اگرچہ مستشرقین کا نام نہیں لیا لیکن انکے باطل عقائد و نظریات کے پیش نظر بہت جامع ترین جوابات دیے ہیں جو درج ذیل ہیں۔ 

لاَ إِكْرَاهَ فِي الدِّينِ قَد تَّبَيَّنَ الرُّشْدُ مِنَ الْغَيِّ فَمَنْ يَكْفُرْ بِالطَّاغُوتِ وَيُؤْمِن بِاللَّهِ فَقَدِ اسْتَمْسَكَ بِالْعُرْوَةِ الْوُثْقَىَ لاَ انفِصَامَ لَهَا وَاللَّهُ سَمِيعٌ عَلِيمٌ (البقرۃ:256 ) اللَّهُ وَلِيُّ الَّذِينَ آمَنُواْ يُخْرِجُهُم مِّنَ الظُّلُمَاتِ إِلَى النُّوُرِ وَالَّذِينَ كَفَرُواْ أَوْلِيَآؤُهُمُ الطَّاغُوتُ يُخْرِجُونَهُم مِّنَ النُّورِ إِلَى الظُّلُمَاتِ أُوْلَئِكَ أَصْحَابُ النَّارِ هُمْ فِيهَا خَالِدُونَ (البقرۃ:257)

سورۃ البقرہ کی درج بالاآیات کی روشنی میں مولانا لکھتے ہیں کہ”صاحبو! دشمنان اسلام نے ایک غلط فہمی پھیلا رکھی ہے کہ “اسلام بزور شمشیر پھیلایا گیاہے” وہ غلط پروپیگنڈے کے عادی ہیں، وہ سفید جھوٹ کہنے سے نہیں ڈرتے، ان کے ضمیر پر تعصب کے گھٹا ٹوپ اَبر چھا گئے ہیں، حق و باطل میں اُنکو تمیز نہیں، وہ اپنی طرح دوسروں کی بھی بد تمیز بنانا چاہتے ہیں۔ کوئی ذرا قرآن کی آیتوں پر غور کرے، وہ تو فرماتا ہے کہ لاَ إِکْرَاہَ فِیْ الدِّیْن دین میں کوئی جبر نہیں۔ وہ فرماتا ہے۔ افانت تکرہ الناس حتی یکونوا مومنین کیا تم لوگوں کوایمان لانے پر مجبو کرو گے، نہیں ، ہر گز نہیں۔ جولوگ امن وامان اختیار کر کے باوجود کفر و شرک کے مسلمانوں کے دامنِ عطوفت میں پناہ لیتے ہیں اُن کی حفاظت کا ذمہ مسلمان لیتے ہیں، اُن کے حقوق کی حفاظت مسلمان کرتے ہیں۔ وہ لوگ ذمی کہلاتے ہیں۔ جو حربی(مسلمانوں سے جنگ کرنے والے) بھی چند روز کے لیے امن لے کر مسلمانوں کے ملک آتے ہیں تو انکو امن دینے کا حکم ہے۔ وان احد من المشرکین استجارک فاجرہ اور اگر کوئی مشرک تمہاری پناہ لینا چاہے تو تم اُسکو پناہ دو۔‘‘ 

“کیا اس رحمۃ اللعالمین نے اپنے دین کو بزور شمشیر پھیلایا؟ جو فرماتا ہے “ جس نے ابو سفیان کے گھر میں پناہ لی، اُس کو امن ہے۔ جس نے مسجد حرام میں پناہ لی، اُسکو امن ہے، جس نے اپنے گھر کے دروازے بند کر لیے اُسکو امن ہے''۔کیا اُس رحمۃ اللعا لمین نے زبردستی دین پھیلایا جن کی تمام لڑائیوں میں مسلمانوں کی طرف سے کل تقریباََ ڈھائی سو(250) آدمی، اور کافروں کے تین چار سو آدمی مارے گئے۔ رحمۃ اللعالمین نے حکم دیا” عورتوں ، بچوں،بوڑھوں کو نہ مارو ، گرجوں اور مندروں میں رہنے والے کو نہ مارو۔ جو لڑنے جھگڑنے والے نہیں، کشت و خون کرنے والے نہیں، اُن پر رحم کرو، اُن کو چھوڑ دو‘‘۔ قرآن میں کوئی غور کرے کہ قرآن میں جابجا قاتلوا ہے۔ باب مفاعلہ شرکت پر دلالت کرتا ہے۔ یعنی اُن کو مارو جو تم کو مارنا چاہتے ہیں۔ بعض جگہ فاقتلوا بھی ہے مگر کن کو؟ جو تم کو مارتے ہیں۔ مسلمانوں سے زیادہ روادار، صلح جو کوئی قوم نہیں''۔²⁷

“صاحبو ! دین اسلام ایک مکمل اور عام دین ہے۔ اس کا مقصد اعلیٰ توحید اور خدا کو ایک ماننا ہے۔اسلام نہ کسی خاندان سے خاص ہے نہ اس میں ذات پات کا جھگڑا ہے ، نہ کسی زبان سے خصوصیت رکھتا ہے۔ “اسلام توحید کے ساتھ مکارمِ اخلاق کی تعلیم دیتا ہے۔”بعثت لا تمم مکارم الاخلاق‘‘ میں بہترین اخلاق کی تکمیل کے لیے بھیجا گیا ہوں (حدیث مشکوٰۃ)۔ اسلام کسی خاص ملک میں محبوس نہیں ہو سکتا اس میں تہذیب نفس اور مکارم اخلاق کے سوا دیوانی اور فوجداری ہر قسم کے قوانین موجود ہیں۔ اسلام حریت اور مساوا ت کو پیدا کرتاہے۔ عورتوں کو بھی صاحب مِلک اور توریث مانتا ہے۔عورتوں کی آزادی کیلے اسمیں خلع کا مسئلہ بھی ہے۔ اسلام میں دوسروں کو قتل کرنا تو ایک طرف کوئی شخص خود کشی بھی نہیں کر سکتا کیونکہ اسلام سکھاتا ہے کہ تم خود اللہ کی مِلک میں ہو اور اسکو خلافِ حکم خدا ضائع نہیں کر سکتے۔

اسلام ایک دریائے ناپید اکنار ہے، جس میں غوطہ مار کر سب پاک ہو جاتے ہیں کوئی زرا یہ تو بتا دے کہ ساری دنیا کے لیے کونسا مذہب خدا نے بھیجا ہے۔ ہندوؤں کے پاس تو یہ ہے کہ اگر کوئی وید کو سن لے تو سیسہ پگھلا کر اسکے کان میں ڈالنا چاہیے۔ مجوسی یا پارسی مذہب میں بھی تبلیغ نہیں، لہٰذا وہ بھی کسی کو پارسی مذہب میں ملا نہیں سکتے۔ یہودیوں کا مذہب اب بھی غیر تبلیغی ہے اور بنی اسرائیل کے علاوہ اور کوئی یہودی بن نہیں سکتا۔ جناب عیسیٰ علیہ السلام بھی بنی اسرائیل میں سے تھے اور موسوی مذہب کے پابند تھے۔ کسی (غیر اسرائیلی) نے آپ سے کوئی مسئلہ پوچھا تو آپ نے فرمایا میں بیٹو ں کی روٹی کتوں کے سامنے نہیں ڈالنا چاہتا۔لہٰذا عیسائی مذہب بھی تمام اقوام کے لیے نہیں ہے۔ کافت الناس اور تمام اقوام عالم کے لیے صرف اسلام ہے۔

''میں یقین سے کہتا ہوں اے مخالفین اسلام ! تم قرآن کو دیکھو اور اسکونظر عمیق سے دیکھو، تمہارے دل میں تمہارے مذہب کی وقعت باقی نہ رہے گی۔ تم اس(قرآن) سے بھاگو گے مگر وہ تم کو کب چھوڑتا ہے، تمہارے کانوں سے تمہاری آنکھوں سے تمہارے دل میں اُترے گا۔ تمہارے دماغ میں بس جائے گا۔ تم مجبور ہو گے کہ اپنے مذہب کی اصلاح کرو، مگر کس کے اصول کی پابندی کے ساتھ ؟ اسلام کے !‘‘“یہ آبِ حیات ہے۔ تمہارے مردوں کو زندہ کر دے گا۔ تم اپنے مسلم ہونے سے انکار کیے چلے جاؤ، مگر دنیا شہادت دے گی، پکارے گی، چلا اُٹھے گی کہ یہ صورت و شکل اسلام کی ہے۔اس کی آنکھیں ہیں مگرافسوس! آنکھوں میں نور نہیں، زبان ہے مگر اس میں لکنت باقی ہے۔ ہاتھ پیر ہیں مگر شل ہیں ۔ تم اسلام سے بھاگو، خوب بھاگو، مگر وہ تم کو کب چھوڑتا۔ تم کو چھاتی سے لگا لے گا، اپنا دودھ پلائے گااور تم کو اپنا بیٹابنالے گا۔''

“بہر حال کامل دین اگر ہے تو اسلام ہی ہے۔ إِنَّ الدِّينَ عِندَ اللَّهِ الإِسْلاَمُ(آل عمران:19) اسلام ہی خدا کے نزدیک دین ہے۔‘‘ وَمَن يَبْتَغِ غَيْرَ الإِسْلاَمِ دِينًا فَلَن يُقْبَلَ مِنْهُ وَهُوَ فِي الآخِرَةِ مِنَ الْخَاسِرِينَ(آل عمران:۸۵)جو اسلام کے سوا کسی اور مذہب کو اپنا دین بنائے گا تو وہ خدا کے پاس کبھی قبول نہیں ہو گا اور وہ آخرت میں خسارہ اور نقصان اُٹھانےوالوںمیں سے ہو گا۔''²⁸

وَإِنْ خِفْتُمْ أَلاَّ تُقْسِطُواْ فِي الْيَتَامَى فَانكِحُواْ مَا طَابَ لَكُم مِّنَ النِّسَاء مَثْنَى وَثُلاَثَ وَرُبَاعَ فَإِنْ خِفْتُمْ أَلاَّ تَعْدِلُواْ فَوَاحِدَةً أَوْ مَا مَلَكَتْ أَيْمَانُكُمْ ذَلِكَ أَدْنَى أَلاَّ تَعُولُوا ) البقرۃ:03(

درج بالا آیت کی روشنی میں مولاناؒ لکھتے ہیں کہ”فانکحواکا امر اباحت کے لیے ہے یعنی متعدد نکاح کر سکتے ہیں، وجوب کے لیے نہیں۔ اس میں صاف صاف بتا دیا گیا کہ اگر عدل و مساوات برقرار نہیں رکھی جاسکتی تو ایک عورت پر قناعت کرنا چاہیے۔ گزشتہ زمانے میں جس قدر چاہتے نکاح کرتے تھے۔ اسکو روکا جا رہا ہے۔ اب رہ گیا پیغمبروں کا حال تو عامۃالناس پر ان کو قیاس نہیں کیا جا سکتا۔ کس قدر افسوس کی بات ہے کہ ایک ہزار گوپیاں اور ننانوے یا سو بیویاں رکھنے والے پر تو اعتراض نہ ہو اور نو بیویاں جن میں سے آٹھ بیوہ ہیں، اُن کی سر پرستی کرنے پر اعتراض کیا جائے۔اپنی آنکھ کو شہتیر تو نظر نہیں آتا اور دوسروں کی آنکھ کا تنکا نظر آجاتا ہے۔ حکم دیا گیا کہ ہے کہ ان نو بیویوں کو طلاق نہیں دی جا سکتی اور کسی عورت سے نکاح نہیں کیا جا سکتا۔ جن لوگوں کے نزدیک تعدد ازواج جائز نہیں وہ ذرا یہ تو بتا دیں کہ موجودہ زمانے کی لاکھوں بلکہ اس سے زیادہ بیواؤں کا کیا علاج کیا جا سکتا ہے؟ اور زنا کاری سے بچنے کی کیا صورت ہے؟ بے تحقیق اعتراض کرنے سے کیا ہوتا ہے؟ ذرا سوچو اور اسلام کی حقانیت کا اعتراف کرو۔''²⁹

وَإِذَا تُتْلَى عَلَيْهِمْ آيَاتُنَا بَيِّنَاتٍ قَالَ الَّذِينَ لاَ يَرْجُونَ لِقَاءنَا ائْتِ بِقُرْآنٍ غَيْرِ هَذَا أَوْ بَدِّلْهُ قُلْ مَا يَكُونُ لِي أَنْ أُبَدِّلَهُ مِن تِلْقَاء نَفْسِي إِنْ أَتَّبِعُ إِلاَّ مَا يُوحَى إِلَيَّ إِنِّي أَخَافُ إِنْ عَصَيْتُ رَبِّي عَذَابَ يَوْمٍ عَظِيمٍ (15) قُل لَّوْ شَاء اللَّهُ مَا تَلَوْتُهُ عَلَيْكُمْ وَلاَ أَدْرَاكُم بِهِ فَقَدْ لَبِثْتُ فِيكُمْ عُمُرًا مِّن قَبْلِهِ أَفَلاَ تَعْقِلُونَ (16) فَمَنْ أَظْلَمُ مِمَّنِ افْتَرَى عَلَى اللَّهِ كَذِبًا أَوْ كَذَّبَ بِآيَاتِهِ إِنَّهُ لاَ يُفْلِحُ الْمُجْرِمُونَ (17)(یونس:۱۵۔۱۷)

مولاناؒ درج بالا آیات کے ضمن میں ؒ لکھتے ہیں کہ”صاحبو! ان آیتوں پر غور کرو۔ رسول خداﷺ نےان منکرین کے پاس چالیس سال گزارے کبھی منہ سے ایک لفظ جھوٹ نہ نکلا۔ اخلاق و عادات سب اچھے تھے۔ خود کفار حضرت ﷺ کو محمد امین کہتے تھے۔ جوشخص آدمیوں کے متعلق جھوٹ نہ کہے، بھلا وہ خدا کے متعلق جھوٹ کہنے کی کیا جرات کر سکتا ہے؟ رسول خداﷺ گو افصح العرب والعجم تھے مگر حدیث شریف اور قرآن میں زمین و آسمان کا فرق ہے۔ قرآن کا طرز بیان جدا اور حدیث کا الگ ۔ قرآن کوئی چھوٹی سی کتاب نہیں۔ وہ تو بہت بڑی کتاب ہے اور مختلف امور میں ہدایت کرتی ہے۔ نہ صرف اسکی فصاحت وبلاغت بے نظیر ہے بلکہ اآہیات، قانون، اصول تمدن اور اخلاقیات سب میں ممتاز ہے۔ قرآ ن کا اسلوب بیان شروع سے آخر تک اعجاز ہی اعجاز ہے۔ اس سب باتوں پر غور نہ کریں اور قرآن شریف کو حضرت ﷺ کی تصنیف سمجھیں تو بڑا ظلم ہوگا۔ایسا کہنا اپنی نادانی کا اعتراف کرنا ہے اور اپنی جہالت کا ثبوت دینا ہے۔

ذرا اتنا تو سوچو! کہ ایک شخص جس نے کبھی قلم کو ہاتھ نہ لگایا ہو، کبھی کسی کے سامنے زانو ئے ادب تہہ نہ کیا ہو، اور ایک ایسے تاریک زمانہ میں پیدا ہوا ہو جب کہ علم وکمال کی معمولی روشنی بھی نہ تھی۔ ایک شخص اُٹھتا ہے اور جاہل سے جاہل قوم کوروشنی پر لاتا ہے اور اسکو متمدن بنا دیتا ہے۔³⁰

سورۃ ھود آیت نمبر 13 کا مولا نا ؒ ترجمہ یوں کرتے ہیں “ کیا یہ کفار کہتے ہیں کہ قرآن پیغمبر کی تصنیف ہے۔ پیغمبر! تم کہو ایسی تصنیف شدہ دس سورتیں تو لاؤ اور خدا کو چھوڑ کر اپنی مدد کے لیے جن جن کو چاہو بلا لو ۔ اگر تم سچے ہو۔‘‘ صاحبو! دس سورتوں کا لانا تو مشکل ہے۔ سورۃ کوثرمیں تین آیتیں ہیں ، اتنی ہی بنا کر لاؤ۔ کیا لا سکو گے؟ کیابنا سکو گے؟ ادیبوں سے مدد لو، شاعروں کو بلا لو، شیاطین اور دیوتاؤں کو پکارو، سر توڑ محنت کرو، غور کرو، فکر کرو، مگر کیا ہوگا؟ وہی عاجزی، وہی لاجواب ہونا۔ آخر میں کہنا پڑے گا ما ہٰذا من کلام البشر³¹

سورۃ النحل کی آیت نمبر 3 کے ضمن میں لکھتے ہیں کہ “بعض عیسائی کہتے ہیں کہ ایک دفعہ ملک شام میں ایک راہب سے رسول اللہ ﷺ ملے تھے اور یہ سب اسی کا پڑھایا ہے۔ کسی صحیح الدماغ کی عقل میں آ سکتا ہے؟ اس راہب نے ایک ملاقات میں تمام قرآن پاک کی تعلیم دے دی ہو۔ ہمارے پاس روایتوں سے ثابت ہے کہ اس نے تصدیق کی کہ موسیٰ کے بعد تم ہی جلیل القدر پیغمبر ہوئے ہو۔ ایسے مہمل اعتراضات کسی صحیح العقل شخص سے نہیں ہو سکتے۔³²

صاحبو! قرآن متواتر ہے۔ حدیث غیر متواتر ہے۔ اگر قرآن پر سے اعتماد اُٹھ جائے توپھر دین کہاں؟ اور اسلام کدھر؟ بے دین لوگو ں کی ایک عادت ہے کہ ہمیشہ قرآن پر اعتراض کریں اور اس میں کمی زیادتی ثابت کریں۔ اسمیں تغیر تبدل کا دعویٰ کریں ۔ بعض بھولے نادان ان ظالموں کی کاروائیوں سے واقف نہیں۔ ایک نادان کہتا ہے کہ بعض آیتیں منسوخ التلاوت بھی ہیں۔ ایک دوسرا ظالم کہتا ہے کہ قرآن میں کمی زیادتی ہو گئی ہے۔ اس کا صحیح نسخہ ہمارے امام کے پاس ہے جو قیامت کے قریب نکلے گا۔یہ لوگ دشمنان دین ہیں۔مسلمانوں کو چاہیے کہ ان کے کہے پر کچھ توجہ نہ دیں۔ جسکی حفاظت کا ذمہ خدا لے، اس میں تغیر و تبدل کس طرح ممکن ہے؟۔''³³

8۔ نتائج تحقیق :