شہد انسان کے لئے اللہ تعالٰی کی عطا کردہ ایک بیش قیمت ایسی نعمت ہے  جسے  طب نبوی میں ایک ممتاز درجہ حاصل ہے ۔اللہ تعالیٰ نے قرآن مجید میں شہد کا ذکر کرتے ہوئے اسے   عوام الناس کےلیے شفا قرار دیا ہے ۔  دورِ حاضر میں سائنسی تحقیق و تجربات  سے شہد کے متعدد طبی فوائد  کا انکشاف ہو چکا ہے۔ شہد    جسم  کے معدافعتی نظام (Immunity System)کو مضبوط بنا  تاہے۔ اس لئے   اومی کرون(Omicron) اورکرونا وائرس (Covid-19)  کی  موجودہ  وبا  ؤں میں  شہد اور طب نبوی ؐ میں متذکرہ دوسری قدرتی غذاؤں کا استعمال  انتہائی نافع اور کارآمد  ہے ۔ شہد کی اجزائے ترکیبی یعنی کاربوہائیڈریٹس ،وٹامنزاور منرلز  کی  افادیت پر  سائنس اوراسلامی تعلیمات کی روشنی میں جاندار اور منظم  کام نہیں ہوسکا۔ تعلیمات ِ نبوی ؐمیں شہد کے استعمال کے بارے میں کئی  زریں  فوائد  کا بیان ہے جسے جدید میڈیکل سائنس بھی تسلیم کرتی ہے۔  زیر نظر مضمون میں شہد کی  طبی افادیت کو اسلامی تناظر میں پیش کرنے کی سعی کی گئی ہے  کیونکہ موجودہ  جدید دور  میں  عوام الناس پراسس شدہ  کھانوں(پیزہ،برگر،کولڈ ڈرنکس وغیرہ) کے عادی  ہو چکے ہیں  جس کی بدولت عام لوگوں  کا مدافعتی نظام کمزور ہوتا جارہا ہے اور وہ  کرونا(Covid-19) اور اومی کرون(omicron) جیسے جان لیوا وائرسز کا آسان شکار ثابت ہوتے ہیں  ۔ زیرِ نظر آرٹیکل  شہد کی طبی اہمیت ، اجزائے ترکیبی   اور اس کے استعمال و فوائد  کے بارے میں سائنسی و اسلامی تعلیمات  وہدایات کوواضح  کرتا ہے۔شہد  پر قلم اٹھانے کا  مقصد  حفظانِ صحت کے لئے شہدکے طبی افادیت کے بارے میں  اسلامی   تعلیمات اور سائنسی تحقیقات  کو    اجاگرکرنا ہےتا کہ  سوسائٹی  میں شہد  اور دوسری قدرتی غذا کے  استعمال کی ترغیب    دی جا سکے ۔

سابقہ تحقیق کا جائزہ

اہل فکر و دانش نے   شہد  کی افادیت پر عمدہ اور  تحقیقی کام کیا  ہے ۔ طب نبوی ﷺ کی ہر کتاب میں شہد

کی افادیت  ملاحظہ کی جاسکتی  ہے۔پروفیسر ڈاکٹر شہزادہ ایم اے بٹ کی تالیف’’ شہد سے اپنا علاج خود کیجیے ‘‘ شہد کی افادیت پر بے انتہا معلوماتی اور کارآمدہے۔ جس میں شہد کے طبی  خواص   دل نشیں انداز میں بیان کئے گئے ہیں۔ملک بشیر احمد کی تصنیف" پاکیزہ شہد پاکیزہ زندگی " شہد کے متعلق انتہائی  مفید معلومات  فراہم کرتی  ہے۔ مصنف موصوف  نے اس تصنیف  میں شہد سے متعلق قرآن وحدیث  کی روشنی میں شہد کے خواص وفوائد  ، اقسام  اوراستعمال کے طریقے  بیان کیے ہیں ۔حکیم سید ابرار حسین کی "شہدسے علاج ِ نبوی ﷺ اور جدید طب" شہد کی طبی افادیت   پر معلومات افزا کتاب ہے۔ اس کتاب میں مصنف متعدد امراض کا علاج بذریعہ شہدمستند حوالہ جات کےساتھ تفصیلاً بیان کرتا ہے۔ اس کتاب کے عمیق  مطالعہ کے بعد اس بات کا بخوبی اندازہ ہو جاتا ہے کہ وبائی ماحول میں حفظان ِ صحت کے لئے شہد کا استعمال کتنا کارآمد ہے!     ۔معظم جاوید کی کتاب "کھجور اور شہد سے علاج " جسے پنجاب بک ڈپو لاہور نے 2008ء میں شائع کیا،شہد کے  طبی  خواص اور نسخوں   پر عمدہ تصنیف ہے۔ اس کتاب میں شہد کی اہمیت و افادیت  طب نبویﷺ کی روشنی میں  سپردِ قلم کی گئی  ہے۔ریسرچ آرٹیکل  مختلف مذاہب میں شہد کی افادیت ،جدید سائنس کی روشنی میں تحقیقی جائزہ" کے عنوان سے ریسرچ جرنل "الاعجاز"جون 2018ء میں چھپا۔ مقالہ نگار فیاض احمد  اور پروفیسر حافظ منیر احمد خان کا آرٹیکل "شہد کی اہمیت، تاریخ ،تہذیب  اور طب کی روشنی میں تحقیقی مطالعہ" ایک کارآمد تحقیق ہے جو   ریسرچ جرنل اسلام آباد اسلامیکس (2:2) میں دسمبر 2019ء میں شائع ہوا۔ مذکورہ بالا تصانیف و مضامین کے علاوہ بھی  شہد کی طبی افادیت   پر کسی نہ کسی سطح پر تجزیہ کیا گیا  ہے۔تاہم     موجودہ وبائی ماحول کے تناظر میں مدافعتی نظامImmunity System  کی بہتری کے لئے قدرتی غذاؤں کے استعمال کو ملحوظ ِ خاطر رکھتے ہوئے  " موجودہ وبائی  ماحول میں شہد کی  طبی     افادیت       جدیدسائنس اور اسلامی تعلیمات کی روشنی میں "  کا عنوان منتخب  کیا گیا ہے۔

منہج تحقیق

اس مقالہ میں معیاری اور  بیانیہ طرزِ تحقیق اپنایا گیا ہے۔زیرنظر تحقیقی  مقالہ   میں   موجودہ وبائی دور میں شہد کے طبی فوائد  کے حوالے سے بنیادی مصادر سے استفادہ   کیا گیا ہے ۔تاہم کچھ ثانوی مصادر و مراجع سے بھی معاونت لی گئی ہے ۔ متعلقہ مواد کے حصول کے لئے انٹرنیٹ کا بھرپور استعمال کیا گیا ہے ۔ تحقیقی  کام سے متعلقہ مواد   کے لئے علامہ اقبال لائبریری  سیالکوٹ  اور سیرت سٹڈی سنٹر سیالکوٹ  کی کتب سے فائدہ اٹھایا گیا  ہے۔ دورِ حاضر میں شہد کی ضرورت و اہمیت واضح کرنے کے لئے شہد کے اجزا کے چارٹس بنائے گئے ہیں۔   

شہد کی فضیلت و عظمت

 قرآن و سنت میں شہد کی فضیلت واضح اور دل نشین انداز میں بیان کی گئی ہے۔قرآن کریم کی متعددآیات  و احادیث میں شہد (Honey) اور شہد کی مکھی کا مختلف انداز میں تذکرہ   پایا جانا اس کی فضیلت  و عظمت پر دلالت کرتا ہے۔ شہد ایسا حیرت انگیز  قدرتی انعام ہے جو انسانی بدن  کے لئے دوسرے اشیا سے زیادہ غذائیت سے بھرپور   ہوتا ہے۔ حضرت علی  فرماتے ہیں کہ شہد ایک  بہترین کھانا  ہے ۔[i] شہد کی  تغذیاتی   نافعیت سے اس بات سے لگایا جاسکتا ہے کہ قرآن پاک میں اہل جنت کے لئے    عمدہ ،اعلیٰ اور خالص شہد کی نہروں  کا تذکرہ  پایا جاتا ہے ۔

ارشاد باری تعالیٰ ہے:

"مَثَلُ الْجَنَّةِ الَّتِي وُعِدَ الْمُتَّقُونَ فِيهَا أَنْهَارٌ مِنْ مَاءٍ غَيْرِ آسِنٍ وَأَنْهَارٌ مِنْ لَّبَنٍ لَّمْ يَتَغَيَّرْ طَعْمُهُ وَأَنْهَارٌ مِنْ خَمْرٍ لَّذَّةٍ لِلشَّارِبِينَ وَأَنْهَارٌ مِنْ عَسَلٍ مُّصَفًّى "[ii]

" جنت جس کا پرہیزگاروں سے وعدہ کیا جاتا ہے اس کی صفت یہ ہے کہ اس میں پانی کی نہریں ہیں جو بو نہیں کرے گا اور دودھ کی نہریں ہیں جس کا مزہ نہیں بدلے گا اور شراب کی نہریں ہیں جو پینے والوں کے لیے (سراسر) لذت ہے اور شہد مصفی کی نہریں ہیں (جو حلاوت ہی حلاوت ہے)۔"

 امام قرطبی لکھتے ہیں :

" والعسل: يذكر ويؤنث. وقال ابن عباس: من عسل مصفى أي لم يخرج من بطون النحل"[iii]

قرآن کریم میں شہد کی مکھی  اور اس کے خواص و کمالات کو بھرپور انداز میں بیان کیا گیا جس سے  شہد کی مکھی کی اہمیت و عظمت کا اندازہ کیا جا سکتا ہے کہ ایک حدیث مبارکہ میں شہد کی مکھی کے قتل سے منع فرمایا گیا ہے۔[iv]

شہد کی مکھی(Honey Bee) موسمیاتی  تبدیلی (Climate Change)سے آگہی رکھتی ہے ۔شہد کی مکھی جب کسی پھول پر بیٹھتی ہے  تو  پھولوں نر تولیدی اعضا  اس کے جسم سے چپک جاتے ہیں۔ جنہیں سائنسی اصطلاح میں  پولن کہا جاتا ہے۔ شہدکی مکھی جب  ایک سے دوسرے پھول پر جاتی ہے تو اس کے نسوانی حصے ان دانوں(پولن) کو اپنی طرف کھینچ کر پولی نیشن(باروردی ) حاصل کرتے ہیں۔اس طرح شہد کی مکھی (النحل)  زرعی پیداوار کے لئے بھی  اہم کردار ادا کرتی ہے۔امریکہ میں 90 اقسام کی زرعی پیداروار شہد کی مکھی کی مرہونِ منت ہے۔[v] جدید سائنس کی ایک تحقیقی رپورٹ کے مطابق شہد کی مکھی کے 60 فیصد جینز انسان  کے اندر بھی موجود  ہوتے ہیں۔[vi]

صاحب "حیات الحیوان " لکھتے  ہیں:

" ومن شأنه في تدبير معاشه أنه إذا أصاب موضعا نقيا بنى فيه بيوتا من الشمع أولا، ثم بنى البيوت التي تأوي فيها الملوك، ثم بيوت الذكور التي لا تعمل شيئا. والذكور أصغر جرما من الإناث"^[vii]

 مذکورہ عبارت کا حاصل یہ ہے کہ شہد کی  مکھی چھتہ کے لئے صاف جگہ کا انتخاب کرتی ہے۔وہ  سب سے قبل چھتہ کا وہ حصہ تیار کرتی ہے جہاں اس نے شہد تیار کرنا ہوتا ہے۔پھر "رانی مکھی " کے لئے ایک گھر بناتی ہے اور اس کے بعد نر مکھیوں کی جگہ بناتی ہے جو معاش کے لئے کوشش نہیں کرتے ۔مادہ مکھیوں کی نسبت نر مکھیاں چھوٹی ہوتی ہیں۔

شہد اللہ تعالیٰ کا بیش قیمت تحفہ ہے۔اس کے حیرت انگیز خواص اس کے عظمت و فضلیت کو چار چاندلگا دیتے ہیں ۔مثال کے طور پر  کوئی چیز شہد میں رکھنے سے خراب  نہیں ہوتی ۔اگر کوئی مردہ جسم شہد میں ڈبو کر رکھ دیا جائے تو کبھی خراب نہ ہو۔ترو تازہ  میوہ جات  شہد میں رکھنے سے چھ ماہ تک خراب نہیں ہوتے  جبکہ گوشت تین ماہ تک خراب اور باسی نہیں ہوتا۔[viii]مصری مقابر میں بادشاہوں کی غذا  کے ذخائر میں شہد رکھا جاتا تھا۔5000 سال سے زائد عرصہ کے بعد بھی شہد باسی نہیں ہوا۔16 ویں صدی عیسوی کے غرقاب جہاز وں سے برآمد شہد کے برتن دریافت ہوئے تو ان کا شہد صدیوں بعد بھی خراب نہ ہوا۔[ix]شہد  میں اشیا مثلاً پھل ،دوائیں وغیرہ رکھ دی جائیں تو وہ طویل عرصہ تک قابلِ استعمال رہتی ہیں اور گلنے سڑنے  یا خراب ہونے سےمحفوظ ہو  جاتی ہیں ۔ شہد میں ایسے کیمیائی مادے ہوتے ہیں جو اینٹی آکسیڈنٹس antioxidants  کا کام کرتے ہیں۔ [x]

ارشاد نبوی ؐ ہے:

"عَن عائشة قالت: قال رسول الله صَلَّى الله عَليْهِ وَسلَّم: ما طلب الدواء بشيء أفضل من شربة عسل"[xi]

"حضرت عائشہ سے روایت ہے کہ رسول اللہ ﷺ نے فرمایا کہ کوئی بھی دوا شہد سے زیادہ  افضل نہیں ہے۔"

شہد کو دوسرے مذاہب میں بھی احترام و قدر کی نگاہ سے دیکھاجاتا ہے۔زبور،تورات ،انجیل ،بدھ مت کی کتابوں ،ویدوں میں شہد کا تذکرہ شہد کی عظمت و تقدیس پر دلالت کرتا  ہے۔

شہد کے غذائی اجزا   ۔۔۔جدیدسائنس  کے تناظر میں

شہد  میں پائے  جانے والے فوری توانائی و حرارت پہنچانے والے غذائی عناصر  دوسری اشیاسے نمایاں کر دیتے ہیں۔  شہد  متعدد بیماریوں سے شفا   دیتا ہے۔درج ذیل جدول میں امریکی زراعتی ڈیپارٹمنٹ کی تحقیق کے مطابق شہد کے غذائی اجزاء   پیش کئے جاتے ہیں۔

  شہد غذائیت  و توانائی سے بھرپور ہوتا ہے  ۔اس میں کولیسٹرول نام کی کوئی چیز نہیں ۔ اس کی غذائیت کا اندازہ اس کے کیمیائی  اور غذائی  اجزاء سے بخوبی ہو رہا ہے ۔ اس میں تقریباً 82 فیصد کاربو ہائیڈریٹس ,فائبر، پروٹین وغیرہ  مختلف مقدار میں موجود ہیں۔انسانی جسم کی نشوونما کا انحصار کسی بھی خوراک میں موجود معدنیات پر ہوتا ہے۔ شہد  تمام لازمی اجزائے غذا کاربوہائیڈریٹس،وٹامنز،فائبر اور منزلز پر مشتمل قدرتی غذاہے جبکہ اس  میں چربی کا نام تک نہیں ۔

مذکورہ بالا جدول میں  شہدکے محض خاص منزلز (معدنیات) کا تذکرہ ہے جبکہ تازہ ترین سائنسی تحقیق کے مطابق  پاکستانی علاقوں میں پیدا ہونے والے   شہد میں کم ازکم 13 معدنی اجزا  پائے جاتے ہیں۔ شہدکے معدنیات انسانی  بدن و جسم کی مضبوطی کے لئے  بہت اہمیت کے حامل ہیں ۔ شہد زنک ،کاپر ،پوٹاشیم،سوڈیم، کیلشیم، فاسفورس اور آئرن  وغیرہ سے بھرپور  ہوتا ہے جو جسم  کی مضبوطی اور حفظان ِ صحت  کے لیے انتہائی اہم ہیں۔ بالخصوص بوڑھے اور کمزور افراد کے لئے  شہد کا استعمال  بے انتہا نافعیت و افادیت  رکھتا ہے۔

شہدکی طبی  افادیت

   شہد  ۔۔۔شفائی اثرات

شہد ایک ایسا  منفرد مرکب ہے جو بدن کو فوری  توانائی فراہم کرتا ہے ۔جوڑوں کو  آسودگی فراہم  فراہم کرتا ہے اور بلغم سے نجات دیتا ہے۔قرآن  و حدیث کے مطالعہ  شہد کے  متعددشفائی اثرات    سامنے آتے ہیں۔  امام بخاری ؒ نے صیح بخاری میں   "باب الدوا ء بالعسل " کے عنوان سے باب مختص کیا ہے ۔ شہد کرہ ارض پر پائی جانے والی  تمام دواؤں(Medicines)سے  افضل و برتر ہے ۔ شہد کے شفائی اثرات بھی دوسری غذاؤں یا دواؤں سے زیادہ ہیں۔جسمانی قوتیں بحال ،مقوی بدن، معدہ طاقتور اور بھوک بڑھاتا ہے،پاگل پن میں مفید و نافع ہے۔جوئیں مارتا ہے۔آنکھوں میں لگایا جائے تو بینائی تیز کرتا ہے۔ ہمیشہ شہد کو پانی میں حل کر کے استعمال کرنا بہتر نتائج دیتا ہے۔جگر کو طاقت دیتا ہے۔شدید زکام ،قوت حافظہ،دل کے مریض ،مثانہ اور گردہ کی پتھری، یرقان ،دمہ،تپ دق ،استقاء  کی بیماری میں مفیدو نافع ہے۔[xiv] شہد نہ صرف غذائی مصنوعات کے طور پر استعمال ہوتا ہے بلکہ  ادویات میں بھی استعمال ہوتا ہے۔ زخموں کے علاج سے لے کر کینسر کے علاج میں بھی  استعمال ہوتا ہے۔[xv]معدہ ،جگراور بصارت کو قوت دیتا ہے۔ معدہ سے ریاح (گیس) کو خارج کرتا ہے۔بھوک بڑھاتا ہے۔موٹاپے ، پرانی قبض، کھٹے ڈکار وں، معدہ کی گیس اور استسقاء   میں ایک لاجواب  دواہے۔اللہ تعالیٰ نے قرآن پاک میں شہد کی مکھی (Honey Bee) کے پیٹ سے خارج ہونے  والے  سیال مادے(شہد) کو انسان کے لئے کامل  شفا قرار دیا ہے۔

ارشاد باری تعالیٰ ہے:

" ثُمَّ كُلِي مِنْ كُلِّ الثَّمَرَاتِ فَاسْلُكِي سُبُلَ رَبِّكِ ذُلُلًا يَخْرُجُ مِنْ بُطُونِهَا شَرَابٌ مُخْتَلِفٌ أَلْوَانُهُ فِيهِ شِفَاءٌ لِلنَّاسِ إِنَّ فِي ذَلِكَ لَآيَةً لِقَوْمٍ يَتَفَكَّرُونَ "^[xvi]

" اور ہر قسم کے میوے کھا۔ اور اپنے پروردگار کے صاف راستوں پر چلی جا اس کے پیٹ سے پینے کی چیز نکلتی ہے جس کے مختلف رنگ ہوتے ہیں۔ اس میں لوگوں (کے کئی امراض) کی شفا ہے بیشک سوچنے والوں کے لیے اس میں بھی نشانی ہے۔"

مذکورہ بالا آیت قرآنی  پر غورکرنے سے معلوم ہوتا ہے کہ شہد کی  مکھی کے پیٹ سے پیداہونے والے شہد  کئی  رنگوں اوراقسام پر مشتمل ہوتا ہے ۔ ہر قسم کے شہد کا رنگ اور فائدہ بھی  الگ  ہے۔نسل ِ انسانی کو باور کروایا  گیا ہے کہ شہد میں  شفا  ہی شفاہے۔علاوہ ازیں اس آیت میں شہد  میں پائے جانے والے   مختلف اجزا یعنی جواہر و فوائد پر     اہل دانش کو تحقیق   کرنے کی ترغیب و تحریک دی گئی ہے ۔شہد اس قدر پاکیزہ اورشفائی اثرات کی حامل منفرد قدرتی غذا ہے کہ اس کے اندر جراثیم (وائرسز ،بیکٹیریا وغیرہ) زندہ نہیں رہ سکتے ۔یہی وجہ ہے کہ اسے جس دوایا غذا میں شامل کر لیا جائے وہاں سے جراثیموں کا خاتمہ ہو جاتا ہے۔شہد میں ایسی پاکیزگی پائی جاتی ہے کہ بدن میں داخل  ہوتے ہی شفائی اثرات مرتب ہوتے ہیں ۔[xvii] متعدد احادیث مبارکہ میں شہد کے شفائی اثرات بیان کئے گئے ہیں ۔نبی کریمﷺ نے شہد استعمال کرنے کی تلقین و تاکید فرمائی ہے۔

ارشاد نبوی ﷺ ہے:

"عَنْ عَبْدِ اللَّهِ، قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ عَلَيْكُمْ بِالشِّفَاءَيْنِ: الْعَسَلِ وَالْقُرْآنِ"[xviii]

" حضرت عبداللہ بن مسعود رضی اللہ تعالیٰ عنہما فرماتے ہیں کہ رسول اللہ ﷺنے فرمایا :اپنے اوپر دو شفاؤں کو لازم کرلو۔ شہد اور قرآن ۔"

ارشاد نبوی ﷺ ہے:

"الشِّفَاءُ فِي ثَلاَثَةٍ: شَرْبَةِ عَسَلٍ، وَشَرْطَةِ مِحْجَمٍ، وَكَيَّةِ نَارٍ، وَأَنْهَى أُمَّتِي عَنِ الكَيِّ"[xix]

" شفاء تین چیزوں میں ہے ۔ شہد کے پینے میں ، پچھنا لگوانے میں اور آگ سے داغنے میں لیکن میں امت کوآگ سے داغ کر علاج کرنے سے منع کرتا ہوں ۔"

ارشاد نبویﷺہے:

"عَن أَبِي هُرَيرة،قال قال رسول الله صَلَّى الله عَليْهِ وَسلَّم: ما للنفساء عندي شفاء مثل الرطب ولا للمريض مثل العسل"[xx]

"حضرت ابو ہریرہ سے روایت ہے کہ رسول اللہ ﷺنے فرمایا، نہیں ہے میرے پاس نفاس والیوں کےلئے تر کھجور جیسی کوئی  شفا دینے والی   چیز اور نہ مریض  کے لئے  شہد جیسی شفا۔"

امام ابن القیم ؒ لکھتے ہیں :

"وَالْعَسَلُ فِيهِ مَنَافِعُ عَظِيمَةٌ، فَإِنَّهُ جَلَاءٌ لِلْأَوْسَاخِ الَّتِي فِي الْعُرُوقِ وَالْأَمْعَاءِ وَغَيْرِهَا، مُحَلِّلٌ لِلرُّطُوبَاتِ أَكْلًا وَطِلَاءً، نَافِعٌ لِلْمَشَايِخِ وَأَصْحَابِ الْبَلْغَمِ، وَمَنْ كَانَ مِزَاجُهُ بَارِدًا رَطْبًا، وَهُوَ مُغَذٍّ مُلَيِّنٌ لِلطَّبِيعَةِ، حَافِظٌ لِقُوَى الْمَعَاجِينِ وَلِمَا اسْتُودِعَ فِيهِ، مُذْهِبٌ لِكَيْفِيَّاتِ الْأَدْوِيَةِ الْكَرِيهَةِ، مُنَقٍّ لِلْكَبِدِ وَالصَّدْرِ، مُدِرٌّ لِلْبَوْلِ، مُوَافِقٌ لِلسُّعَالِ الْكَائِنِ عَنِ الْبَلْغَمِ"[xxi]

مذکورہ عبارت کا حاصل یہ ہے کہ شہد بہت زیاد ہ اور غیرمعمولی طبی فوائد کا حامل ہے۔ یہ غذائیت سے بھرپور  ہوتا ہے۔ اس  کااستعمال معدہ اور آنتوں میں پیدا ہونے والی گندگیوں کو صاف کر دیتا ہے۔بلغم کے مریضوں کے لئے نافع ہے۔پاخانہ نرم کرنے میں اہم کردار اداکرتا ہے۔معجونوں  میں استعمال ہوتا ہے اور انہیں لمبے عرصے تک خراب نہیں ہونے دیتا ۔ یہ  نہ صرف بد ذائقہ دواؤں کو بہتر کر دیتا ہے بلکہ ان کے مضر اثرات کو بھی دور کر دیتا ہے۔جگر ،سینہ صاف کرتا ہے۔پیشاب آور ہے، بلغمی کھانسی میں  فائدہ مندہے۔

شہد ۔۔۔ ہر بیماری کا علاج

شہد  میں  ایسے طبی خواص پائے جاتے ہیں کہ ایک حدیث نبویؐ کی روسے  شہد میں  موت کے علاوہ ہر بیماری کا علاج  پایا جاتا ہے۔

امام ابو نعیم"طب نبویؐ" روایت نقل کرتے ہیں :

"عليكم بالسنا والسنوت فإن فيهما شفاء من كل داء إلا السام قيل: يا رسول الله وما السام قال: الموت.قال عَمْرو في حديثه: وقال ابن أبي عبلة: السنوت الشبت.قال: وقال آخرون: هو العسل الذي يكون في زقاق السمن"[xxii]

"رسول اللہ ﷺ نے فرمایا ،سناء اور سنوت کو لازم پکڑ لو کیونکہ ان دونوں میں موت کے سوا ہر بیماری کا علاج ہے۔ ایک قول کے مطابق سنوت سے مراد شہد ہے۔"

آیور وید ک او ر طب یونانی میں شہد کو تمام بیماریوں کے علاج کے لئے رام بان ( اکسیر) قرا ر دیا گیا ہے۔جدید  سائنسی تحقیق  سے ثابت ہو چکا ہے کہ شہد  واقعتاً شفا ئی اثر ات کی حامل غذاہے ۔کینڈا میں ہونے ایک تازہ ترین تحقیق کے مطابق شہد اور دار چینی کے مرکب میں بہت سی بیماریوں  سے شفا پائی جاتی ہے۔[xxiii]تمام اطبا ء اس بات پر متفق ہیں کہ انسان  تمام ادویات کی نسبت شہد سب سے زیادہ  مؤثر میڈیسن ہے  کیونکہ اس میں تقویت معدہ،جودتِ  تغذیہ  اور اشتہاء طعام جیسے خواص پائے جاتے ہیں۔[xxiv] شہد آنکھوں کی بیماریوں ،  دمہ ، گلے کے انفیکشن ، تپ دق ، پیاس ، ہچکی ، تھکاوٹ ، چکر آنا ، ہیپاٹائٹس ، قبض  ، بواسیر  ، السر اور زخموں کے علاج میں استعمال ہوتا ہے ۔[xxv]شہد قلب و روح کو فرحت بخشتا ہے۔ چہرے کو حسن کو دوبالا کرتا ہے اور موٹاپا کا خاتمہ کرتا ہے۔جوڑوں کے درد میں نافع ہے۔مختصر یہ کہ شہد کا استعمال ہر فرد (بچے سے لیکر بوڑھے تک) اور ہر بیماری کے علاج کے لئے استعمال کیا جاسکتا ہے۔تاہم ہر مرض میں شہد کے استعمال کا طریقہ کار مختلف ہوتا ہے۔

اسہال کا علاج

طب نبویؐ کے مطابق اسہال کا علاج شہد میں پایا جاتا ہے۔ابوسعیدخدری رضی اللہ عنہ روایت کرتے ہیں :

"عَنْ أَبِي سَعِيدٍ: أَنَّ رَجُلًا أَتَى النَّبِيَّ صَلَّى اللهُ عَلَيْهِ وَسَلَّمَ فَقَالَ: أَخِي يَشْتَكِي بَطْنَهُ، فَقَالَ: اسْقِهِ عَسَلًا ثُمَّ أَتَى الثَّانِيَةَ، فَقَالَ: اسْقِهِ عَسَلًا ثُمَّ أَتَاهُ الثَّالِثَةَ فَقَالَ: اسْقِهِ عَسَلًا ثُمَّ أَتَاهُ فَقَالَ: قَدْ فَعَلْتُ؟ فَقَالَ: صَدَقَ اللَّهُ، وَكَذَبَ بَطْنُ أَخِيكَ، اسْقِهِ عَسَلًا فَسَقَاهُ فَبَرَأَ"[xxvi]

"ایک صاحب نبی کریم ﷺکی خدمت میں حاضر ہوئے اور عرض کیا کہ میرا بھائی پیٹ کی تکلیف میں مبتلا ہے۔ آنحضرتﷺ نے فرمایا کہ انہیں شہد پلا پھر دوسری مرتبہ وہی صحابی حاضر ہوئے ۔ آپ نے اسے اس مرتبہ بھی شہد پلانے کے لیے کہا وہ پھر تیسری مرتبہ آیا اور عرض کیا کہ (حکم کے مطابق ) میں نے عمل کیا ( لیکن شفاء نہیں ہوئی ) آنحضرت صلی اللہ علیہ وسلم نے فرمایا کہ اللہ تعالیٰ سچا ہے اور تمہارے بھائی کا پیٹ جھوٹا ہے ، انہیں پھر شہد پلا ۔ چنانچہ انہوں نے شہد پھر پلایا اور اسی سے وہ تندرست ہو گیا ۔"

صاحب "الحاوی فی الطب "رقمطرازہیں :

"وينفع من الطرش الإسهال الدَّائِم الْمُتَوَاتر وتلطيف الْغذَاء وتغطية الرَّأْس وَشرب المَاء الْحَار وَمَاء الْعَسَل"[xxvii]

قلب  ،رنج  اور گردہ کے امراض کا علاج

حضرت عائشہ صدیقہ سے روایت ہے:

" عَنْ عَائِشَةَ، زَوْجِ النَّبِيِّ صَلَّى اللهُ عَلَيْهِ وَسَلَّمَ أَنَّهَا كَانَتْ إِذَا مَاتَ الْمَيِّتُ مِنْ أَهْلِهَا فَاجْتَمَعَ لِذَلِكَ النِّسَاءُ، ثُمَّ تَفَرَّقْنَ إِلَّا أَهْلَهَا وَخَاصَّتَهَا أَمَرَتْ بِبُرْمَةٍ مِنْ تَلْبِينَةٍ فَطُبِخَتْ، ثُمَّ صُنِعَ ثَرِيدٌ، فَصُبَّتِ التَّلْبِينَةُ عَلَيْهَا، ثُمَّ قَالَتْ: كُلْنَ مِنْهَا، فَإِنِّي سَمِعْتُ رَسُولَ اللهِ صَلَّى اللهُ عَلَيْهِ وَسَلَّمَ يَقُولُ:التَّلْبِينَةُ مُجِمَّةٌ لِفُؤَادِ الْمَرِيضِ، تُذْهِبُ بَعْضَ الْحُزْنِ"[xxviii]

" سیدہ عائشہ رضی اللہ تعالیٰ عنہا زوجہ نبی ﷺسے روایت ہے کہ ان کے گھر والوں میں سے جب کسی کا انتقال ہو جاتا تو اس کی تعزیت کے لئے عورتیں جمع ہو کر چلی جاتیں اور ان کے گھر والے اور خواص ہی باقی رہ جاتے تو سیدہ (رضی اللہ عنہا) ہانڈی میں شہد اور دودھ ملا کر حریرہ پکانے کا حکم دیتیں جب وہ پک جاتا پھر ثرید بنایا جاتا پھر ثرید میں دودھ اور شہد کا حریرہ ڈال دیا جاتا پھر فرماتیں اس میں سے کھاؤ کیونکہ میں نے رسول اللہ صلی اللہ علیہ وسلم سے سنا ہے آپ فرماتے تھے دودھ اور شہد ملا حریرہ مریض کے دل کو خوش کرتا ہے اور رنج وغم کو دور کرتا ہے۔"

ارشاد نبویؐ ہے:

" عَن عائشة قالت: كان أحب الشراب إلى رسول الله ﷺالعسل "[xxix]

"حضرت عائشہ سے روایت ہے کہ نبی کریم ﷺ کو شہد پینا سب سے زیادہ پسند تھا۔"

شہدصبح نہار پینے سے گردے صاف   ہوجاتے ہیں ۔  گردہ کی پتھری میں   شہد کا استعمال مفید ہے۔[xxx]

ارشاد نبویؐ ہے:

"عَن عائشة قالت: قال رسول الله صَلَّى الله عَليْهِ وَسلَّم: الخاصرة عرق الكلية فإذا تحرك آذى صاحبها فداوها بالماء المحرق والعسل"[xxxi]

"حضرت عائشہ سے روایت ہے کہ رسول اللہ ﷺ نے فرمایا ،خاصرہ (خاصرہ گردے کا مرکزی حصہ کہلاتا ہے۔جدید سائنس کی اصطلاح میں اسے پیلویس (Pelvis)کہا  جاتا ہے۔)گردے کا ایک اہم حصہ ہے جب اس حصے میں سوزش والے گردے میں شدید تکلیف ہوتی ہے۔ اس کا علاج جلے ہوئے پانی(ابلے ہوئے پانی )  اور شہد سے کیا جائے "

قولنج ،کان اور دانت کا علاج

قولنج کے مریض کے لئے شہد کا استعمال فائدہ مند ہے۔اس سلسلے میں امام  ا بو نعیم "طب نبوی" میں  لکھتے ہیں :

"الماء الحار المحرق مع العسل يحل القولنج ويفشو الرياح"[xxxii]

کان کے امراض پیچیدہ ہوتے ہیں ۔لیکن عوام الناس  ان کو سنجیدہ نہیں لیتے اور عام دوائیں کانوں میں انڈیلتے ہیں اور  سماعت سے محروم ہو جاتے ہیں ۔شہد کان کے مسائل کے لئے مفید دوا ہے۔کان میں شہد ڈالنے سے پیپ بند ہوجاتی ہے اور کان درد میں بھی افاقہ ہوتا ہے۔[xxxiii]کان کی درد میں  شہد  کا استعمال  مفید و نافع ہے۔

صاحب "الحاوی فی الطب " لکھتے ہیں :

"عصارة حب الرُّمَّان إِذا طبخت مَعَ الْعَسَل جيد لوجع الْأذن لي رَأَيْت أطباء دَهْرنَا متفقين على نفع السنجار من وجع الْأذن"[xxxiv]

دانتوں کےامراض کے لئے شہد کا استعمال مفید و نافع ہے ۔ڈاکٹر عائشہ لکھتی ہیں کہ سرکہ کے ساتھ دانتوں میں لگایا جائے تو دانت چمک جائیں گے ۔[xxxv]شہد کے استعمال سے انسان کے دانت مضبوط اور صحت مند رہتے ہیں یعنی شہد دانتوں کی حفاظت کرتا ہے۔اکثر و بیشتر  افراد  مسوڑھوں ،دانتوں کی درد   کا شکار ہوتے ہیں۔مسوڑھوں میں زخم ہو جاتے ہیں ،شہد لگا نے سے یہ زخم صاف اور مندمل  ہو جاتے ہیں۔[xxxvi]دانتوں کے لئے شہد ایک بہترین ٹانک ہے ۔گرم پانی میں شہد ،سرکہ اور نمک ملاکر غرارے  کرنے سے گلے اور مسوڑھوں کا ورم  ختم ہوجاتا ہے۔[xxxvii]

صاحب "الحاوی فی الطب" لکھتے ہیں:

"ويحفظ الْأَسْنَان على صِحَّتهَا الْعَسَل"[xxxviii]

علامہ ذہبی ؒلکھتے ہیں کہ شہد  کا سنون(منجن) مسوڑھوں کی حفاظت کرتا ہے اور دانتوں کی سفید کرتا ہے۔[xxxix]

صاحب"القانون فی الطب" رقمطراز ہیں :

"وَيكون شرابه مَاء الْعَسَل وَيجب أَن يحفظ أَسْنَانه"[xl]

شوگر   کا مریض اور شہد

شوگر  کے مریض کے شہد کا استعمال مضرِ صحت نہیں کیونکہ شہد کی شکر میں مکھی کے منہ سے نکلنے والے جوہر شامل ہوتے ہیں  اور خون میں شکر کی مقدار زیادہ نہیں ہوتی ۔بلکہ  شہد  کا مسلسل استعمال  بلڈ شوگر  اعتدال پر لاتا  ہے۔ [xli]شہد کی قدرتی طورپر حیرت انگیز افادیت کا اندازہ اس امر سے لگایا جاسکتا ہے  کہ ذیابیطس کےمریض  میٹھے یا شکر کا استعمال انتہائی نقصان دہ ہے لیکن شہد اپنی شیرینی کے باوجود ذیابیطس کا مریض استعمال کرسکتا  ہے۔دودھ میں شہد ملا کر مریض کے لئے انتہائی مفید و نافع ہے۔[xlii]

قوتِ حافظہ میں اضافہ

شہد کا استعمال قوتِ حافظہ کے لئے عمدہ ہوتا ہے اس لئے  شہد کا استعمال  علم و تحقیق سے وابستہ افراد کےلئے بے انتہا کارآمد ہے  ۔ ڈاکٹر عائشہ درانی لکھتی  ہیں کہ قوت حافظہ تیز تر کرنے کے لئے     شہد کا استعمال مفید ہے۔[xliii]

 امام زہری ؒ  فرماتے ہیں:

"عَلَيْكَ بِالْعَسَلِ فَإِنَّهُ جَيِّدٌ لِلْحِفْظِ، وَأَجْوَدُهُ أَصْفَاهُ وَأَبْيَضُهُ، وَأَلْيَنُهُ حِدَّةً، وَأَصْدَقُهُ حَلَاوَةً "^[xliv]

 مذکور ہ عبارت کے مطابق قوت  حافظہ بہتر  اور تیز بنانے کے لئے شہد کا استعمال کرنا چاہیے۔سب سے اچھا شہد وہ ہوتا ہے جو صاف ستھرا ، سفید ،میٹھا اورنرم ہو۔

قوت ِمدافعت میں اضافہ

شہد کے استعمال سے انسان کا مدافعتی نظام مضبوط ہوتا ہے  اس لئے  انسان خطرناک وائرسز  اوروبائی بیماریوں سے تحفظ فراہم کرتا ہے۔

ارشاد ِ نبوی ؐ ہے:

"عَنْ أَبِي هُرَيْرَةَ، قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : "مَنْ لَعِقَ الْعَسَلَ ثَلَاثَ غَدَوَاتٍ كُلَّ شَهْرٍ، لَمْ يُصِبْهُ عَظِيمٌ مِنْ الْبَلَاءِ"[xlv]

"حضرت ابوہریرہ رضی اللہ تعالیٰ عنہ بیان فرماتے ہیں کہ نبی کریم ﷺ نے ارشاد فرمایا جو ہر ماہ تین روز صبح کو شہد چاٹ لے اسے کوئی بڑی آفت( وبا-بیماری) نہ آئے گی۔"

شہد بیک وقت غذا، دوا ،میوہ ،حلوہ  اور شربت ہے  جو ہر مہلک  بیماری سے جسم کا دفاع یقینی بناتا ہے۔ حضرت علیؓ شہد کو تمام غذائی اشیا سے افضل ترین  غذا قرار دیتے ہیں۔

حضرت علیؓ فرماتے ہیں :

"قال على رضى الله عنه انما لدنيا ستة أشياء مطعوم ومشروب وملبوس ومركوب ومنكوح ومشموم. فاشرف المطعومات العسل وهو مذقة ذباب "^[xlvi]

اللہ تعالیٰ نے جس طرح قرآن کریم کو  قلب و روح کے لئے شفا کا ذریعہ  بنایا ہے  ایسے ہی شہد کو انسانی بدن و جسم کو  ہر قسم کی  مرض و آفت سے مدافعت و  شفا کا ذریعہ بنایا ہے۔نبی کریمﷺ کی عادتِ مبارکہ تھی  کہ آپﷺ شہد کو پانی میں ملاکر  ہمیشہ خالی پیٹ یا نہار منہ پیا کرتےتھے۔نبی کریمﷺ کی  اسی عادت  مبارکہ کا فائدہ حضرت ابو ہریرہ رضی اللہ تعالیٰ عنہ کی روایت سےواضح  ہوتا ہے کہ جوشخص مہینہ میں محض 3 دن   شہد چاٹ لیا کرے، وہ اس  مہینے کسی مہلک ( وبائی بیماری) میں مبتلا نہیں ہو نے سے بچ جائے گا۔نبی کریم ﷺ کی زندگی کا ہر پل سیرت رسولﷺ کی کتب کی صورت میں محفوظ ہے۔نبی کریمﷺ کی روزانہ شہد پینے کی عادت مطہرہ ثابت کرتی ہےکہ جو فردبھی یہ عادت اپنائے گا وہ   مہک و موذی امراض سے محفوظ  رہے گا کیونکہ شہد کے استعمال سے  اس کا مدافعتی نظام   (Immunity System)بیماریوں اور وباؤں کے خلاف زیادہ مضبوط ہوجاتا ہے۔

مدافعتی نظام میں اضا  فہ ، جدید میڈیکل سائنس کے تناظرمیں

عصر حاضر میں جدید  میڈیکل سے بھی ثابت ہو چکا ہے کہ  خالص شہد  انسانی بدن  کے مدافعتی نظام (immunity system) کومضبوط اوربہتر کرتا ہے۔ خالص شہد اپنے اندرکاربو ہائیڈریٹس (Carbohydrates)، معدنی اجزا(Minerals) اور وٹامنز (Vitamins)کی بدولت   قوت مدافعت  میں بہتری کے لئے حیرت ناک خزانہ  کی حیثیت رکھتاہے۔جدید میڈیکل سائنس کی تحقیق ثابت کرتی ہے کہ شہد کی غذائی مصنوعات  مدافعتی نظام کے لئے انتہائی فائدہ مند ہے  ۔شہد جسم میں اینٹی باڈیز پیدا کرنے کے ساتھ ساتھ جسم میں پہلے سے موجود مدافعتی خلیوں کو مضبوط اور فعال کرتا ہے۔[xlvii] پھولوں کے تولید ی دانےPollen مکھی کے بدن سے  چپک جاتے ہیں ۔ یہ پولن شہد کا حصہ ہوتے ہیں جوجسم کے دفاعی نظام کی ترویج میں اہم مقام رکھتےہیں۔^[xlviii] قرآن مجید اس امر کی نشاندہی کرتا ہے کہ شہد کی مکھی کے پیٹ سے مختلف قسم کی رطوبتیں خارج ہوتی ہیں۔جن کو میڈیکل سائنس  میں انزائمزEnzymes کہاجاتاہے۔یہ انزائمز مختلف امراض کے علاج میں مفید ہے۔جدید میڈیکل سائنس کے ماہرین نے شہد سے رائل جیلی Royal Jellyنام کا کیمیائی مادہ علیحدہ کر لیا ۔ جرمنی میں یہ chemical  مختلف امراض سے شفا کے لئے استعمال کیا گیا۔عصرحاضر میں رائل جیلی  کا سب سے بڑا مرکز  چین  میں پایا جاتا ہے ۔چین میں رائل جیلیRoyal Jelly کے نام سے خالص مشروبات  اور ٹیکے تیار کیے جاتے ہیں۔^[xlix]

اس ضمن میں مقالہ نگار Ciric, J لکھتا ہے:

Honey has therapeutic impact because it comprises chemicals such as royal jelly, porpolis and pollen. That is why it stimulates the immune system. So, it is useful for patient of Covid-19 and other viral diseases.[l]

شہد  میں پائے جانے والے  اجزائے ترکیبی(پورپولس،پولن ،رائل جیلی)  فوری توانائی بہم پہنچاتے ہیں۔یہ

فوری انرجی(Instant Energy) وبائی اور دیگر امراض کے خلاف قوت مدافعت فراہم کرتی ہے۔اس طرح موجودہ وبائی دور میں  شہد کا استعمال کرنے والے فرد کا مدافعتی نظام مظبو ط اور توانا ہو جاتا ہے  ،وہ کسی حد تک کرونا اور دیگر وبائی وائرسز کا آسانی سے شکار ہونے سے محفوظ رہتاہے۔

  مقالہ نگار Hossain لکھتا ہے:

Honey is beneficial for those patients who are suffering from Covid-19 because elements of honey boost the immune system. [li]

مذکورہ عبارت دلالت کرتی ہے کہ شہد ان مریضوں کے لیے فائدہ مند ہے جو کوویڈ 19 میں مبتلا ہیں کیونکہ شہد کے عناصر مدافعتی نظام کو بڑھاتے ہیں۔ میڈیکل سائنس کے روسے شہد کے علاوہ دیگر   غذاؤں کو جسم کو توانائی فراہم کرنے  میں    کچھ وقت درکار ہوتا ہے لیکن  شہد کا خاصہ ہے کہ یہ جسم کو   فوری توانائی Instant Energyپہنچاتا ہے۔یہی وجہ ہے کہ دنیا  میں پیداہونے والے شہد کا 90 فیصد بطور غذا  استعمال کیا جاتاہے۔[lii]جدید میڈیکل سائنس بے شمار تجربات کر چکی ہے کہ   شہد ایک جامع اور مکمل میڈیسن  کی حیثیت رکھتا ہے۔یہ  نہ صرف جسم سے گندے  مادوں کو نکالتا ہے بلکہ جسم کو وائرسز virusesکے خلاف جسم میں  قوت مدافعت میں اضافہ کرتا ہے۔جیساکہ گذشتہ صفحات میں گزرچکاہے کہ انسانی  بدن کوجتنے بھی کیمیائی وغذائی اجزا کی ضرورت رہتی ہے ۔ان میں سے ہر عنصر شہد میں بدرجہ اتم پایاجاتا  ہے۔

مقالہ نگار Hossain لکھتا ہے:

It has been proved from a lot of medical research studies that honey has potential healing ability against many bacterial, dangerous and viral diseases. [liii] 

بہت سے طبی تحقیقی مطالعات سے یہ بات ثابت ہو چکی ہے کہ شہد میں بہت سے وبائی ومہک بیماریوں کے خلاف شفا یابی کی صلاحیت موجود ہے۔پھوڑے پھنسیاں ((Carbuncle کا سب سے بڑا سبب جسم میں  قوت  ِ مدافعت کی کمی  ہے۔ پھوڑے پھنسیاں اور کیل اور مہاسے کے شکار  نوجوانوں کو خالی  پیٹ روزانہ   شہد   پلایا گیاتو ایسے  مریض محض ایک ہفتہ میں صحت یاب ہوگئے۔^[liv]  شہد میں پائے جانے والے وٹامنز ،منرلز وغیرہ  پوری تندہی سے وائرسزviruses کو ختم کرنے کا باعث بنتےہیں ۔شہد  کا استعمال  وائرسز کے  اثرات زائل کر دیتا ہے۔

جدید میڈیکل کی ریسرچ کے مطابق شہد میں وائرس دشمن عناصرپروپولسPorpolis اور رائل جیلیRoyal Jelly پائے جاتے ہیں ۔لیبارٹری تجربات کے مطابق   شہد کے اندر وائرسز کو ہلاک کرنے کی استعداد دوسری تمام ادویات سے بہت  زیادہ   ہے۔ علاوہ ازیں شہد کا استعمال جسم کی قوتِ مدافعت میں اضافہ بھی کرتا ہے۔

مذکورہ بالا دلائل و براہین سے یہ حقیقت واضح ہوجاتی ہے کہ   موجودہ وبائی دور میں  مدافعتی نظام immunity system))کو مضبوط  وفعال کرنے کے لئے خالص شہد  کا استعمال کلیدی کردار ادا کرسکتا ہے۔ خالص شہد کے اندر پائے جانے والے  حیرت انگیز کیمیائی مرکبات،رائل جیلی Royal Jelly، پروپولس Propolis،پولن pollen، کاربو ہائیڈریٹس (Carbohydrates)، معدنیات (Minerals) اور وٹامنز (Vitamins) انسانی بدن کی مدافعتی نظام لئے قدرت کا انمول خزانہ کی حیثیت رکھتے ہیں۔ ثابت ہوا کہ شہد کی طبی افادیت کے بارے میں  جدید میڈیکل سائنس کی تحقیقات  اور طب نبوی ﷺ میں ہم آہنگی پائی جاتی ہے۔

نتائج تحقیق

1۔      جدید  میڈیکل سائنس اور طب نبویﷺ  کے مطالعہ سے واضح ہوتا ہے کہ موجودہ وبائی ماحول میں شہد کا استعمال وائرسز (Viruses)سے تحفظ کے لئے بہترین  اور مکمل دوا ہے۔

2۔     خالص شہد  میں فوری توانائی و حرارت پہنچانے والے غذائی  و معدنی  عناصر(Nutrients and minerals)  پائے جاتے ہیں  جو موجودہ وبائی دور میں حفظان ِ صحت کے لئے  انتہائی   مفید و نافع ہیں ۔ علاوہ ازیں  بلاشبہ  شہد کا استعمال  جسم  کی متعدد پوشیدہ بیماریوں کے خلاف مدافعتی نظام (Immunity System)کو مضبوط بناتاہے۔

3۔     خالص شہد کا استعمال اسہال  ،پرانی قبض ،دل کےامراض  ،جگر اور معدہ ،دانت و کان کے امراض ،قوت ِ حافظہ کی کمی ، قولنج ،خون کی کمی ، جنسی امراض  ،مدافعتی نظام (Immunity System) کی کمزوری وغیرہ  کے مسائل و امراض  میں بے انتہا   فائدہ مند  ہے۔

4-       شہدذیابیطس کے   مریض  کے لئے شفائی اثرات رکھتا  ہے کیونکہ اس  میں ایک حیرت انگیز  کیمیائی مادہ   ہوتا ہے   جو     ذیابیطس کے مریض کے بلڈ شوگر میں اضافہ کرنے کی بجائے    اسے اعتدال میں  لاتا ہے۔

5 ۔      مصنوی غذاو خوراک(برگر ،پیزہ،شوارما وغیرہ)  کا استعمال انسانی مدافعتی نظام کے لئے تباہ کن ہے اس لئے جسم کے مدافعتی نظام کے بہتری کے لئے   شہداور دوسری قدرتی غذاؤں کا استعمال کرنانا گزیر ہے تاکہ انسان کا مدافعتی نظام کرونا وائرس (Covid-19)اور اومی کرون (Omicrone)جیسے مہلک وائرس کا مقابلہ کرنے کے قابل ہو سکے۔

حواشی و حوالہ جات